കോട്ടക്കല്‍ ആര്യവൈദ്യശാലയുടെ ഏറ്റവും പുതിയ മൊബൈല്‍ ആപ്പ് പ്രവര്‍ത്തനമാരംഭിച്ചു. ആര്യവൈദ്യശാലയുടെ ബ്രാഞ്ച് ക്ലിനിക്കുകള്‍, ആശുപത്രികള്‍, ഔഷധങ്ങളെ കുറിച്ചുള്ള വിവരങ്ങള്‍, അംഗീകൃത വിതരണക്കാര്‍, പ്രസിദ്ധീകരണങ്ങള്‍ തുടങ്ങി നിരവധി കാര്യങ്ങളാണ് അപ്ലിക്കേഷനിലൂടെ അറിയാം.
അതേസമയം, പ്രിസ്‌ക്രിപ്ഷന്‍ അനുസരിച്ച് ആര്യവൈദ്യശാലയുടെ ഔഷധങ്ങള്‍ ഓണ്‍ലൈനായി വാങ്ങാനും സാധിക്കുന്നതാണ്. ആയുര്‍വേദ ചികിത്സയുടെ സാധ്യതകള്‍ കൂടുതല്‍ ജനകീയമാക്കുന്നതിന്റെ ഭാഗമായാണ് മൊബൈല്‍ ആപ്ലിക്കേഷന്‍ പുറത്തിറക്കിയിരിക്കുന്നത്.
‘കോട്ടയ്ക്കല്‍ ആയുര്‍വേദ’ എന്ന പേരിലുള്ള ആപ്പ് ഗൂഗിള്‍ പ്ലേസ്റ്റോര്‍, ആപ്പ് സ്റ്റോര്‍ എന്നിവയില്‍ നിന്നും ഡൗണ്‍ലോഡ് ചെയ്യാന്‍ സാധിക്കും. ആയുര്‍വേദ ഡോക്ടര്‍മാര്‍ക്ക് ഉപകാരപ്രദമായ ഫീച്ചറുകളും ഇവയില്‍ ഉള്‍ക്കൊള്ളിച്ചിട്ടുണ്ട്. ‘തെറാപ്യൂട്ടിക് ഇന്‍ഡക്‌സ്’ ഉള്‍ക്കൊള്ളിച്ചത് ആയുര്‍വേദ ഡോക്ടര്‍മാര്‍ക്ക് ഏറെ പ്രയോജനമാകും. ആര്യവൈദ്യശാലയുടെ എല്ലാ സേവനങ്ങളും ഒറ്റക്കുടക്കീഴില്‍ ലഭ്യമാകുന്ന തരത്തിലാണ് ആപ്ലിക്കേഷന്‍ രൂപകല്‍പ്പന ചെയ്തിരിക്കുന്നത്.