എറണാകുളത്ത് 20 മുതല് 30 ഏക്കര് വരെ സ്ഥലം വാങ്ങാനൊരുങ്ങി കേരള ക്രിക്കറ്റ് അസോസിയേഷന്. ഇതിനായി അടുത്തമാസം 28 ന് മുമ്പ് താല്പര്യപത്രം നല്കണമെന്നാണ് പരസ്യത്തിലുള്ളത്. കൊച്ചിയില് ക്രിക്കറ്റിന് വേണ്ടി മാത്രമായി അന്താരാഷ്ട്ര തലത്തില് ക്രിക്കറ്റ് സ്റ്റേഡിയം പണിയാനാണ് ഇപ്പോഴത്തെ നീക്കം. നിലവില് ക്രിക്കറ്റും ഫുട്ബോളും കൊച്ചിയില് കലൂര് സ്റ്റേഡിയത്തിലാണ് സംഘടിപ്പിക്കുന്നത്.
അതേസമയം, കാര്യവട്ടത്തെ ഇന്ത്യ-ശ്രീലങ്ക മൂന്നാം ഏകദിന മത്സരത്തില് കാണികള് കുറഞ്ഞതിനെ വിമര്ശിച്ച് കേരള ക്രിക്കറ്റ് അസോസിയേഷന് അദ്ധ്യക്ഷന് ജയേഷ് ജോര്ജ് രംഗത്തെത്തിയിരുന്നു. കാണികള് കുറഞ്ഞത് കേരളത്തിന് തിരിച്ചടിയാകും. ഇതുമൂലം സ്പോണ്സര്മാര് നിരാശയിലാണ്. വരാനിരിക്കുന്ന ഏകദിന ലോകകപ്പ് കേരളത്തിലേക്ക് കൊണ്ടുവരാനുളള ശ്രമങ്ങളെ ഇത് ബാധിക്കും. കാണികളുടെ കുറവ് മറ്റ് അസോസിയേഷനുകള് ആയുധമാക്കുമെന്നും അദ്ദേഹം ചൂണ്ടിക്കാട്ടി.