ന്യൂഡൽഹി: ഇത്തവണത്തെ യൂണിയൻ ബജറ്റിൽ ഇന്ത്യൻ റെയിൽവേയ്ക്കായി വലിയ പ്രഖ്യാപനങ്ങൾ ഉണ്ടായേക്കുമെന്ന് റിപ്പോർട്ട്. ഫെബ്രുവരി ഒന്നിന് കേന്ദ്ര ധനമന്ത്രി നിർമല സീതാരാമനാണ് ബജറ്റ് അവതരണം നടത്തുക. ഹൈഡ്രജൻ ട്രെയിനുകളെ കുറിച്ചുള്ള പ്രഖ്യാപനവും ബജറ്റിൽ ഉണ്ടാകുമെന്നാണ് പ്രതീക്ഷിക്കുന്നത്. ഇരുപതോളം ഹൈഡ്രജൻ ട്രെയിനുകളുടെ സർവീസ് ആരംഭിക്കുവാനാണ് റെയിൽവേ മന്ത്രാലയം പദ്ധതിയിടുന്നതെന്നാണ് പുറത്തു വരുന്ന വിവരം.
ഹൈഡ്രജൻ ട്രെയിനുകൾ മേക്ക് ഇൻ ഇന്ത്യ പദ്ധതിയിൽപ്പെടുത്തി ഇതിനായി സ്വന്തമായി സാങ്കേതിക വിദ്യ വികസിപ്പിക്കുമെന്നാണ് വിവരം. നിലവിൽ ചൈനയിലും ജർമ്മനിയിലും ഓടുന്ന ഹൈഡ്രജൻ ട്രെയിനുകളുടെ മാതൃകയിലാവും പദ്ധതി നടപ്പിലാക്കുക. ആദ്യഘട്ടത്തിൽ ഇന്ത്യൻ റെയിൽവേയുടെ നാരോ ഗേജ് ഹെറിറ്റേജ് റൂട്ടുകളിലാവും ഹൈഡ്രജൻ പവർ ട്രെയിനുകൾ സർവ്വീസ് നടത്തുക.. ഈ ഡിസംബറോടെ ട്രെയിനുകൾ പുറത്തിറക്കാനാണ് റെയിൽവേ വൃത്തങ്ങൾ വ്യക്തമാക്കുന്നത്.
ഡാർജിലിംഗ് ഹിമാലയൻ റെയിൽവേ, നീലഗിരി മൗണ്ടൻ റെയിൽവേ, കൽക്ക ഷിംല റെയിൽവേ, മാഥേരൻ ഹിൽ റെയിൽവേ, കാൻഗ്ര വാലി, ബിൽമോറ വാഘായി, മാർവാർദേവ്ഗഢ് മദ്രിയ തുടങ്ങിയ ഇന്ത്യൻ റെയിൽവേയുടെ പൈതൃക റൂട്ടുകളെല്ലാം നാരോ ഗേജ് ആണ്. നിലവിൽ ഡീസൽ എഞ്ചിനുകളിലാണ് സർവീസ്. 2023 ഡിസംബർ മുതൽ ഹൈഡ്രജൻ ട്രെയിനുകൾ പൈതൃക റൂട്ടുകളിൽ പുറത്തിറക്കുമെന്ന് കേന്ദ്ര റെയിൽവേ മന്ത്രി അശ്വിനി വൈഷ്ണവ് നേരത്തെ പ്രഖ്യാപിച്ചിരുന്നു.
കാർബൺ ബഹിർഗമനം കുറയ്ക്കുന്നതിലും കാലാവസ്ഥാ ലക്ഷ്യങ്ങൾ കൈവരിക്കുന്നതിലും ഹൈഡ്രജനിൽ പ്രവർത്തിക്കുന്ന ട്രെയിൻ നിർണായക പങ്ക് വഹിക്കുമെന്നാണ് വിലയിരുത്തപ്പെടുന്നത്.