തമിഴ് സംവിധായകന്‍ ആറ്റ്‌ലി ഷാരൂഖ് ഖാനെ നായകനാക്കി ഒരുക്കുന്ന ‘ജവാന്‍’ സിനിമക്കെതിരെ മോഷണ പരാതി. തമിഴ്‌നാട് ഫിലിം പ്രൊഡ്യൂസേഴ്‌സ് കൗണ്‍സിലില്‍ നിര്‍മാതാവായ മാണിക്യം നാരായണന്‍ ആണ് പരാതി നല്‍കിയത്. ‘പേരരസ്’ എന്ന സിനിമയുടെ കഥ മോഷ്ടിച്ചാണ് ആറ്റ്‌ലി ‘ജവാന്‍’ എഴുതിയത് എന്നാണ് നിര്‍മാതാവിന്റെ ആരോപണം. നവംബര്‍ ഏഴിന് ശേഷം പരാതിയില്‍ അന്വേഷണത്തിന് ഉത്തരവിടുമെന്ന് തമിഴ്‌നാട് ഫിലിം പ്രൊഡ്യൂസേഴ്‌സ് കൗണ്‍സില്‍ അറിയിച്ചു.
ജവാനില്‍’ ഷാരൂഖ് ഖാന്‍ ഇരട്ടവേഷത്തിലാണ് എത്തുന്നത്. ‘പേരരസിലും’ അതിലെ നായക കഥാപാത്രമായ വിജയകാന്ത് ഇരട്ടവേഷങ്ങള്‍ അവതരിപ്പിച്ചിരുന്നു. 2006ലാണ് ‘പേരരസ്’ റിലീസ് ചെയ്തത്. ബാല്യകാലത്ത് പിരിഞ്ഞുപോകുന്ന ഇരട്ട സഹോദരങ്ങള്‍ കാലങ്ങള്‍ക്ക് ശേഷം വീണ്ടും കണ്ടുമുട്ടുന്നതാണ് ‘പേരരസിന്റെ’ കഥ. ജവാനില്‍ ഷാരൂഖ് ഖാന്‍ സൈനിക വേഷത്തിലാണ് എത്തുന്നത്. വിജയ് സേതുപതി ‘ജവാനിലെ’ വില്ലന്‍ കഥാപാത്രത്തെ അവതരിപ്പിക്കും. നയന്‍താരയാണ് ചിത്രത്തിലെ നായിക. ദീപിക പദുകോണും ചിത്രത്തില്‍ അതിഥി വേഷത്തിലെത്തുമെന്നും റിപ്പോര്‍ട്ടുകളുണ്ട്. യോഗി ബാബു, പ്രിയാമണി എന്നിവരും ചിത്രത്തിലുണ്ട്.
ജവാന്റെ’ ഒടിടി സ്ട്രീമിംഗ് അവകാശം 120 കോടിക്കാണ് നെറ്റ്ഫ്‌ലിക്‌സ് സ്വന്തമാക്കിയിരിക്കുന്നത്. അടുത്ത വര്‍ഷം ജൂലൈയില്‍ ‘ജവാന്‍’ പ്രേക്ഷര്‍ക്ക് മുന്നിലെത്തും.