കൊച്ചി: ജനങ്ങള്‍ക്ക് ഭീഷണിയായി നില്‍ക്കുന്ന കോട്ടയത്തെ ആകാശപാത പൊളിച്ചു നീക്കണോ എന്നതില്‍ സേഫ്ടി അതോറിറ്റിയുമായി കൂടിയാലോചിച്ച ശേഷം കലക്ടര്‍ തീരുമാനിക്കുമെന്നു സര്‍ക്കാര്‍ ഹൈക്കോടതിയെ അറിയിച്ചു. ആകാശപാത പൊളിച്ചു മാറ്റണമെന്ന എ.കെ ശ്രീകുമാറിന്റെ ഹര്‍ജി പരിഗണിക്കുകയായിരുന്നു കോടതി. സര്‍ക്കാരിന്റെ മറുപടി ഹൈക്കോടതി രേഖപ്പെടുത്തിയ ശേഷം പിന്നീടു പരിഗണിക്കുന്നതിനായി മാറ്റിവെച്ചു.
അതേസമയം, പണി പാതിവഴിയിലായ ആകാശപാതയുടെ തൂണുകള്‍ തുരുമ്പിച്ച് അപകടകരമായ സാഹചര്യമുണ്ടെന്നു പാരാതിക്കാരന്‍ ഹര്‍ജിയില്‍ ചൂണ്ടിക്കാട്ടുന്നു. എന്നാല്‍, മുകളിലേയ്ക്കുള്ള ചവിട്ടു പടി നിര്‍മിക്കാന്‍ സ്ഥലം കണ്ടെത്താനാകാത്തതാണ് പണി നിര്‍ത്തി വയ്ക്കാന്‍ കാരണമെന്നാണ് വിവരാവകാശ നിയമപ്രകാരമുള്ള മറുപടി. ജില്ലാ കലക്ടറും സംസ്ഥാന സര്‍ക്കാരും റോഡ് സേഫ്റ്റി അതോറിറ്റിയുമാണ് കേസിലെ എതിര്‍ കക്ഷികള്‍. തിരുവഞ്ചൂര്‍ രാധാകൃഷ്ണന്‍ എംഎല്‍എ മുന്‍കൈ എടുത്തു തുടങ്ങി വച്ച പദ്ധതി നടപ്പാക്കാന്‍ സര്‍ക്കാര്‍ ഫണ്ട് അനുവദിക്കുന്നില്ലെന്നാണ് നിലവിലെ ആരോപണം.
2016 ഫെബ്രുവരിയിലാണ് റോഡു മുറിച്ചു കടക്കുന്നതിനു പകരം സുരക്ഷിതമായി കയറി ഇറങ്ങുക എന്ന ഉദ്ദേശ്യത്തോടെ കോട്ടയത്ത് അഞ്ച് റോഡുകള്‍ വന്നു ചേരുന്ന സ്ഥലത്ത് 5.75 കോടിയുടെ പദ്ധതിയായ ആകാശ പാതയുടെ നിര്‍മാണം ആരംഭിച്ചത്. പദ്ധതിക്കായി ഇതിനകം ഒന്നേമുക്കാല്‍ കോടി ചെലവഴിച്ച് 14 ഇരുമ്പു തൂണുകളില്‍ 24 മീറ്റര്‍ ചുറ്റളവില്‍ ഇരുമ്പു പ്ലാറ്റ്‌ഫോം നിര്‍മിച്ചു. എസ്‌കലേറ്റര്‍ വഴി കയറി ഇറങ്ങാനാകും വിധമായിരുന്നു പദ്ധതി രൂപകല്‍പന ചെയ്തത്. നാലു ലിഫ്റ്റുകളും പദ്ധതിയിലുണ്ടായിരുന്നു. എന്നാല്‍, സ്ഥലം ലഭിക്കാതെ വന്നതോടെ പണി സ്തംഭിക്കുകയായിരുന്നു.