ന്യൂഡൽഹി: അടുത്ത വർഷം ഫെബ്രുവരിയോടെ ലോകത്തൊട്ടാകെ കോവിഡ് കേസുകൾ വീണ്ടും വർദ്ധിക്കുമെന്ന് മുന്നറിയിപ്പുമായി ഗവേഷകർ. ലോകത്താകെയുള്ള കോവിഡ് രോഗികളുടെ എണ്ണം ഫെബ്രുവരിയോടെ 18.7 ദശലക്ഷമായി ഉയരുമെന്ന് ഗവേഷകർ മുന്നറിയിപ്പ് നൽകുന്നു. വാഷിംഗ്ടൺ സർവ്വകലാശാലയിൽ നടത്തിയ പഠനത്തിലാണ് ഇക്കാര്യങ്ങൾ വ്യക്തമാക്കുന്നത്. കോവിഡ് മരണ നിരക്കിലും വർദ്ധനവുണ്ടാകുമെന്നാണ് മുന്നറിയിപ്പ്.
കോവിഡ് വ്യാപനം ഡിസംബറോട് കൂടി തന്നെ ആരംഭിച്ചേക്കുമെന്ന് ഗവേഷകർ ചൂണ്ടിക്കാട്ടുന്നു. തണുത്ത കാലാവസ്ഥയിൽ രോഗവ്യാപനം രൂക്ഷമാകും. അമേരിക്കയിൽ രോഗബാധിതരുടെ എണ്ണം പത്ത് ലക്ഷം വരെ ഉയർന്നേക്കാൻ സാധ്യതയുണ്ട്. ഫെബ്രുവരി അവസാനത്തോടെ രോഗവ്യാപനം കുറയും.
അതേസമയം, ജർമ്മനിയിൽ അടുത്തിടെ കൊറോണ തരംഗത്തിന് കാരണമായത് ബി.ക്യു.1, ബി.ക്യു.1.1 വകഭേദങ്ങൾ കാരണമാണ്. വരും ദിവസങ്ങളിൽ യൂറോപ്പിന്റെ മറ്റ് ഭാഗങ്ങളിലേക്കും ഈ വൈറസ് വകഭേദങ്ങൾ വ്യാപിക്കുമെന്ന് ഗവേഷകർ അറിയിച്ചു.