തിരുവനന്തപുരം: ബാറ്ററിയിൽ പ്രവർത്തിക്കുന്ന വാഹനങ്ങളുടെ വിൽപ്പന കൂടുതൽ വേഗത്തിലാക്കാനുള്ള നടപടികളുമായി ഉത്തർപ്രദേശ് സർക്കാർ. ഇതിന്റെ ഭാഗമായി 2022ലെ ഇലക്ട്രിക് വെഹിക്കിൾ പോളിസി സർക്കാർ പുറത്തിറക്കി. നിർമ്മാണത്തിനായുള്ള നിക്ഷേപം ആകർഷിക്കുന്നതിനും പണം ഈടാക്കുന്നതിനും ബാറ്ററിയിൽ പ്രവർത്തിക്കുന്ന മൊബിലിറ്റി ഓപ്ഷൻ തിരഞ്ഞെടുക്കുന്ന ഉപഭോക്താക്കൾക്ക് പ്രോത്സാഹനങ്ങൾ നൽകുന്നതിനും പദ്ധതികൾ ആവിഷ്‌ക്കരിക്കാനാണ് സർക്കാരിന്റെ തീരുമാനം.
പുതിയ പോളിസി പ്രാബല്യത്തിൽ വരുന്ന ആദ്യ മൂന്ന് വർഷത്തിനുള്ളിൽ എല്ലാ സെഗ്മെന്റ് ഇലക്ട്രിക് വാഹനങ്ങൾ വാങ്ങുമ്പോൾ റോഡ് നികുതിയിലും രജിസ്ട്രേഷൻ ഫീസിലും 100 ശതമാനം ഇളവ് നൽകുമെന്നാണ് സർക്കാർ പ്രഖ്യാപിച്ചിട്ടുള്ളത്. ഇത്തരത്തിൽ വാങ്ങുന്ന വാഹനങ്ങൾ സംസ്ഥാനത്ത് തന്നെ നിർമ്മിച്ചവയാണെങ്കിൽ നാലാമത്തെയും അഞ്ചാമത്തെയും വർഷത്തേക്ക് പോലും നീട്ടി നൽകുമെന്നും പുതിയ ഇവി പോളിസിയിൽ പറയുന്നു.
ഇലക്ട്രിക് ഇരുചക്രവാഹനങ്ങൾ വാങ്ങുന്നതിന് ഫാക്ടറി ചെലവിൽ 15 ശതമാനം സബ്സിഡിയും നൽകും. ഒരു വാഹനത്തിന് പരമാവധി 5,000 രൂപ വരെ സബ്ഡിസിയാണ് ലഭിക്കുന്നത്. ആദ്യം വിൽക്കുന്ന 25,000 വാഹനങ്ങൾക്ക് വിധേയമായി ഒരു ലക്ഷം രൂപ വരെ സബ്സിഡിയും ലഭിക്കും. ഇലക്ട്രിക് ത്രീ വീലറുകൾക്ക്, ആദ്യത്തെ 50,000 യൂണിറ്റുകൾക്ക് 12,000 രൂപ വരെ സബ്സിഡിയുണ്ട്. അതേസമയം ഇലക്ട്രിക് ബസുകളിൽ ആദ്യത്തെ 400 യൂണിറ്റുകൾക്ക് 20 ലക്ഷം രൂപ വരെയാണ് സബ്‌സിഡി ലഭിക്കുന്നത്.