ലോകത്തെവിടെയിരുന്നും സൈബര്‍ ഡോമിന്റെ ഓഫീസ് വെര്‍ച്വലായി സന്ദര്‍ശിക്കാനും ആശയ വിനിമയം നടത്താനും കേരള പോലീസിന് ഇനി സാധിക്കും. അവിറാം സ്റ്റുഡിയോയുമായി കൈകോര്‍ത്താണ് മെറ്റാവേഴ്‌സ് രംഗത്തേക്ക് കേരള പോലീസ് എത്തിയത്. ഇതോടെ, മെറ്റാവേഴ്‌സില്‍ സാന്നിധ്യം ഉറപ്പിച്ച രാജ്യത്തെ ആദ്യ പോലീസ് ഏജന്‍സിയെന്ന നേട്ടം ഇനി കേരള പോലീസിന് സ്വന്തം.
വെര്‍ച്വല്‍ റിയാലിറ്റിയില്‍ അധിഷ്ഠിതമായി പ്രവര്‍ത്തിക്കുന്ന ഇന്റര്‍നെറ്റ് സംവിധാനമാണ് മെറ്റാവേഴ്‌സ്. വെര്‍ച്വലായി സൃഷ്ടിക്കുന്ന ചുറ്റുപാടുകളിലൂടെ ആശയ വിനിമയം നടത്താന്‍ മെറ്റാവേഴ്‌സിലൂടെ സാധിക്കും. ഓണ്‍ലൈന്‍ രംഗത്ത് നമ്മുടെ ദിവസേനയുള്ള കാര്യങ്ങള്‍ ഭാവിയില്‍ മെറ്റാവേഴ്‌സ് വഴി നടപ്പാക്കുമെന്നാണ് പ്രതീക്ഷ.