കൽപ്പറ്റ: കമ്മ്യൂണിസ്റ്റ് പാർട്ടികളുടെ ലയനം സംബന്ധിച്ച നിലപാട് വ്യക്തമാക്കി സിപിഐ നേതാവ് ബിനോയ് വിശ്വം. സിപിഐയുടെ പ്രസക്തിയെക്കുറിച്ചും അദ്ദേഹം സംസാരിച്ചു. ഇന്ത്യയിൽ സിപിഐയുടെ വളർച്ച പോരെന്നും അദ്ദേഹം അഭിപ്രായപ്പെട്ടു.
സമ്മേളനത്തിന് ആളുണ്ടാകും. എന്നാൽ തെരഞ്ഞെടുപ്പ് സമയം ചിലർ അങ്ങോട്ടും ഇങ്ങോട്ടും പോകുന്നുവെന്ന് അദ്ദേഹം ചൂണ്ടിക്കാട്ടി. ലയനം എന്ന സങ്കൽപ്പം സിപിഐക്കില്ല. സിപിഐ ആരുമായും ലയിക്കില്ല. കമ്മ്യൂണിസ്റ്റ് ഐക്യത്തെ സിപിഐ തളളി പറയില്ല. എന്നാൽ ലയനം എന്ന പൈങ്കിളി പദത്തോട് യോജിപ്പില്ലെന്നും അദ്ദേഹം അറിയിച്ചു.
സിപിഐ ജനങ്ങളുമായി അകന്ന് നിൽക്കുന്നു. ആരെയും കുറ്റം പറഞ്ഞിട്ട് കാര്യമില്ല.വീഴ്ച നമ്മളുടേത് തന്നെയാണ്. ജനങ്ങളിലേക്ക് ഇറങ്ങി ചെല്ലാൻ തയ്യാറാവണം. അർജന്റീന, കൊളംബിയ, അന്റാർട്ടിക തുടങ്ങി ലോകത്തിലെ എല്ലാ കാര്യങ്ങളും നമ്മൾ പറയുമെന്നും എന്നാൽ നാട്ടിലെ കാര്യങ്ങൾ അറിയില്ല പറയില്ലെന്നും അദ്ദേഹം വിമർശിച്ചു.