തിരുവനന്തപുരം: രാജ്യത്ത് ഇനി ഭാവിയുള്ളത് ബിജെപിയ്ക്ക് മാത്രമാണെന്ന് കേന്ദ്ര ആഭ്യന്തര മന്ത്രി അമിത് ഷാ. കേരളത്തിലും താമര വിരിയുമെന്ന് അദ്ദേഹം പറഞ്ഞു. പട്ടികജാതി മോർച്ച സംഘടിപ്പിച്ച പട്ടികജാതി സംഗമം ഉദ്ഘാടനം ചെയ്ത് സംസാരിക്കവെയാണ് അദ്ദേഹം ഇക്കാര്യം അറിയിച്ചത്. കഴക്കൂട്ടം അൽസാജ് കൺവെൻഷൻ സെന്ററിലാണ് പട്ടികജാതിസംഗമം സംഘടിപ്പിച്ചിട്ടുള്ളത്. പത്മനാഭ സ്വാമിയുടെ മണ്ണിൽ പട്ടികജാതി സംഗമത്തിൽ പങ്കെടുക്കാനായതിൽ സന്തോഷമുണ്ടെന്ന് അദ്ദേഹം അറിയിച്ചു.
ലോകത്ത് നിന്ന് കമ്മ്യൂണിസവും രാജ്യത്ത് നിന്ന് കോൺഗ്രസും അപ്രത്യക്ഷമാവുകയാണ്. കേരളത്തിൽ രാഷ്ട്രീയ പ്രവർത്തനം മാത്രം പോരെന്നും ബി ജെ പി പ്രവർത്തകർക്ക് രക്തസാക്ഷിയാകാനുള്ള മനസ് കൂടി വേണമെന്നും അദ്ദേഹം വ്യക്തമാക്കി. പാവപ്പെട്ടവരുടെ ഉന്നമനത്തിനായിട്ടാണ് പ്രധാനമന്ത്രി നരേന്ദ്രമോദി പ്രവർത്തിക്കുന്നതെന്നും അദ്ദേഹം കൂട്ടിച്ചേർത്തു.
എട്ട് വർഷമായി നരേന്ദ്രമോദി സർക്കാർ രാജ്യത്ത് അധികാരത്തിൽ ഇരിക്കുന്നു. കോൺഗ്രസ് പാർട്ടി അറുപത് വർഷം രാജ്യം ഭരിച്ചു. കമ്മ്യൂണിസ്റ്റ് പാർട്ടി രാജ്യത്തിലെ ചില സംസ്ഥാനങ്ങളിൽ അധികാരം കൈയ്യാളുകയും കേന്ദ്രത്തിൽ കോൺഗ്രസ് സർക്കാരിനെ പിന്തുണയ്ക്കുകയും ചെയ്തു. ഇവരൊക്കെ ദളിതർക്കും പട്ടിക ജാതി പട്ടിക വർഗ്ഗങ്ങൾക്കും വേണ്ടി എന്ത് ചെയ്തുവെന്ന ചോദ്യവും അദ്ദേഹം ഉന്നയിച്ചു.