കോഴിക്കോട്: സംസ്ഥാനത്തെ നിലവിലെ രാഷ്ട്രീയ വിവാദങ്ങളിൽ പ്രതികരണവുമായി മന്ത്രി പി എ മുഹമ്മദ് റിയാസ്. വികസനവുമായി സർക്കാർ മുന്നോട്ട് പോകുമ്പോൾ അത് തടസപ്പെടുത്തുന്നുവെന്ന് അദ്ദേഹം കുറ്റപ്പെടുത്തി. എന്നാൽ കുലുക്കിയാൽ കുലുങ്ങുന്ന സർക്കാരല്ല ഇപ്പോൾ കേരളത്തിലുള്ളതെന്നും അദ്ദേഹം പറഞ്ഞ. കോഴിക്കോട് മാദ്ധ്യമ പ്രവർത്തകരോട് സംസാരിക്കവെയായിരുന്നു അദ്ദേഹത്തിന്റെ പരാമർശം.
വികസന പ്രവർത്തനവുമായി സർക്കാർ മുന്നോട്ടു പോകുമ്പോൾ അതിന്റെ എല്ലാ നിലയിലുമുള്ള സന്തോഷം പങ്കുവെക്കുന്നത് ഈ നാട്ടിലെ പൗരന്മാരാണ്. അങ്ങനെ മുന്നോട്ട് പോകുമ്പോൾ സർക്കാരിനെ ഒന്ന് കുലുക്കി വികസന പ്രവർത്തനത്തെ മെല്ലെപോക്കാക്കി മാറ്റാമെന്ന് ആരെങ്കിലും ഒന്ന് കരുതിയാൽ, അങ്ങനെ കുലുങ്ങിയാൽ കുലുങ്ങി വീഴുന്ന ഒരു സർക്കാരല്ല കേരളത്തിൽ ഇന്ന് ഭരണം നടത്തുന്നത് എന്നുള്ളത് പൊതുവെ പറയുകയാണെന്ന് അദ്ദേഹം ചൂണ്ടിക്കാട്ടി. ഏതെങ്കിലും പ്രത്യേക ആളെ നോക്കിയിട്ടല്ല പറയുന്നതെന്നും അദ്ദേഹം ചൂണ്ടിക്കാട്ടി.