മുല്ലപ്പെരിയാര് മേല്നോട്ട സമിതി അധ്യക്ഷനെ മാറ്റണമെന്ന കേരളത്തിന്റെ ആവശ്യം സുപ്രീംകോടതി തള്ളി. കേന്ദ്ര ജല കമ്മീഷനിലെ മുതിര്ന്ന ഉദ്യോഗസ്ഥനെ മേല്നോട്ട സമിതി ചെയര്മാനാക്കണമെന്നായിരുന്നു കേരളത്തിന്റെ ആവശ്യം. എന്നാല്, നിലവിലെ അംഗങ്ങളില് ഒരു മാറ്റവും വരുത്താന് പോകുന്നില്ലെന്ന് ജസ്റ്റിസ് എ.എം. ഖാന്വില്ക്കര് അധ്യക്ഷനായ ബെഞ്ച് വ്യക്തമാക്കി.
കേന്ദ്ര ജല കമ്മീഷനിലെ ചീഫ് എന്ജിനീയര് ഗുല്ഷന് രാജ് ആണ് നിലവിലെ മേല്നോട്ട സമിതി അധ്യക്ഷന്. അതില് മാറ്റം വേണ്ടെന്ന് അഡിഷണല് സോളിസിറ്റര് ജനറല് ഐശ്വര്യ ഭാട്ടി അറിയിച്ചു. ഡാം സുരക്ഷ നിയമ പ്രകാരമുള്ള അധികാരങ്ങള് മുല്ലപ്പെരിയാര് മേല്നോട്ട സമിതിക്ക് നല്കുന്നതില് സുപ്രീംകോടതി നാളെ ഉത്തരവ് പറയാനും തീരുമാനിച്ചു.