ന്യൂഡൽഹി: രാഷ്ട്രപിതാവായ മഹാത്മാ ഗാന്ധിയുടെ ഇഷ്ടഗാനം ‘അബൈഡ് വിത്ത് മീ’ റിപ്പബ്ലിക്ക് ദിന ആഘോഷങ്ങളിൽ നിന്ന് ഒഴിവാക്കിയതിൽ വിശദീകരണവുമായി കേന്ദ്ര സർക്കാർ. ഗാനം ഒഴിവാക്കിയത് ഇന്ത്യൻ സംഗീതങ്ങൾക്ക് കൂടുതൽ പ്രാധാന്യം നൽകുന്നതിന് വേണ്ടിയാണെന്ന് കേന്ദ്ര സർക്കാർ അറിയിച്ചു.
‘യേ മേരേ വതൻ കെ ലോഗോൺ’ എന്ന ഗാനമാണ് ‘അബൈഡ് വിത്ത് മീ’ക്ക് പകരമായി റിപ്പബ്ലിക് ദിനാഘോഷങ്ങളിൽ ഇന്ത്യൻ സൈന്യം വായിക്കുക. 1962 ലെ ഇന്ത്യാ – ചൈന യുദ്ധത്തിൽ വീരചരമം വരിച്ച ഇന്ത്യൻ സൈനികർക്ക് വേണ്ടി കവി പ്രദീപ് രചിച്ച ഗാനമാണ് ‘യേ മേരേ വതൻ കെ ലോഗോൺ’. 2020 ലെ റിപബ്ലിക്ക് ദിന ആഘോഷ വേളയിൽ തന്നെ അബൈഡ് വിത്ത് മീ ഒഴിവാക്കാൻ കേന്ദ്രം ആലോചിച്ചിരുന്നു. എന്നാൽ പ്രതിഷേധം ശക്തമായതോടെ ഇത് നടപ്പിലാക്കാൻ കഴിഞ്ഞിരുന്നില്ല. ജനുവരി 29 ന് നടക്കുന്ന ബീറ്റിംഗ് റിട്രീറ്റിൽ പരമാവധി ഇന്ത്യൻ ഗാനങ്ങൾ മാത്രമേ സൈനിക ബാൻഡ് വായിക്കുകയുള്ളൂവെന്നാണ് ഔദ്യോഗിക വൃത്തങ്ങൾ വ്യക്തമാക്കുന്നത്.
1950 മുതൽ ബീറ്റിംഗ് റിട്രീറ്റിന്റെ ആകർഷണങ്ങളിലൊന്നായിരുന്നു ‘അബൈഡ് വിത്ത് മീ’. സ്കോട്ടിഷ് ആംഗ്ലിക്കൽ സാഹിത്യകാരനായ ഹെൻറി ഫ്രാൻസിസ് ക്ഷയം ബാധിച്ച് മരണക്കിടക്കയിൽ കിടന്നപ്പോഴാണ് ഈ ഗാനം രചിച്ചത്. ജീവിതത്തിലും മരണത്തിലും ഒരുപോലെ തുണയാകാൻ ഈശ്വരനോട് പ്രാർത്ഥിക്കുന്ന ഈ ഗാനം ഗാന്ധിജിയ്ക്ക് ഏറ്റവും പ്രിയപ്പെട്ടതാണ്.