ന്യൂഡല്‍ഹി: ഇന്ത്യന്‍ ടെന്നീസ് താരം സാനിയ മിര്‍സ വിരമിക്കുന്നു. ഈ സീസണിലെ മത്സരങ്ങള്‍ക്ക് ശേഷം വിരമിക്കും എന്ന് സാനിയ മിര്‍സ അറിയിച്ചു. ഓസ്ട്രേലിയന്‍ ഓപ്പണിലെ വനിതാ ഡബിള്‍സില്‍ ആദ്യ റൗണ്ട് തോല്‍വിക്ക് പിന്നാലെയാണ് സാനിയ ഇക്കാര്യം വ്യക്തമാക്കിയത്. തമറ സിദാന്‍സെക്- കാജ ജുവന്‍ സഖ്യത്തോടാണ് സാനിയ മിര്‍സയും 35 കാരിയായ നാദിയ കിചെനോക്കും പരാജയപ്പെട്ടത്.
‘ചില കാര്യങ്ങള്‍ ഈ തീരുമാനത്തിനു പിന്നിലുണ്ട്. ഇന്നത്തെ മത്സരത്തിനിടയില്‍ എന്റെ കാല്‍ മുട്ടില്‍ അസഹനീയമായ വേദന ഉണ്ടായിരുന്നു. അതാണ് തോല്‍വിക്ക് കാരണമെന്ന് ഞാന്‍ പറയുന്നില്ല. പക്ഷെ എനിക്ക് പ്രായമായി. മുന്‍പത്തെ പോലെ നന്നായി കളിക്കാന്‍ കഴിയുന്നില്ല. മത്സരങ്ങള്‍ക്കായി ഞാന്‍ എന്റെ മൂന്നുവയസുകാരനായ മകനുമായി കൂടുതല്‍ ദൂരം യാത്ര ചെയ്യുന്നത് അവന്റെ ജീവന്‍ പോലും അപകടത്തിലാക്കുന്നു’-സാനിയ മിര്‍സ പറഞ്ഞു.
വനിതാ ഡബിള്‍സില്‍ മുന്‍ ലോക ഒന്നാം നമ്പര്‍ താരം കൂടിയാണ് മുപ്പത്തഞ്ച്കാരിയായ സാനിയ.