തിരുവനന്തപുരം: കെ റെയിൽ വിഷയത്തിൽ ശശി തരൂരിനെതിരെ വിമർശനവുമായി കെ മുരളീധരൻ എംപി. ശശി തരൂർ മുഴുവൻ സമയ രാഷ്ട്രീയക്കാരൻ അല്ലാത്തതുകൊണ്ടാണ് കെ റെയിൽ വിഷയത്തിൽ കാര്യങ്ങൾ അറിയാതെ പോയതെന്ന് അദ്ദേഹം പറഞ്ഞു. യു.ഡി.എഫ് വസ്തുത പഠന സംഘത്തിന്റെ റിപ്പോർട്ടിന്റെ അടിസ്ഥാനത്തിലാണ് കോൺഗ്രസ് കെ റെയിലിനെ എതിർക്കുന്നതെന്നും അദ്ദേഹം വ്യക്തമാക്കി.
യു.ഡി.എഫ് എം.പിമാർ കെ റെയിലിനെതിരെ റെയിൽവെ മന്ത്രിക്ക് നൽകിയ നിവേദനത്തിൽ ശശി തരൂർ ഒപ്പുവച്ചിരുന്നില്ല. ഈ സാഹചര്യത്തിലാണ് തരൂരിനെതിരെ വിമർശനവുമായി കെ മുരളീധരൻ രംഗത്തെത്തിയത്. പദ്ധതിയെക്കുറിച്ച് കൃത്യമായി പഠിക്കാൻ സമയം വേണമെന്നായിരുന്നു കെ റെയിലിനെതിരെയുള്ള നിവേദനത്തിൽ ഒപ്പുവെയ്ക്കാത്തതിന് ശശി തരൂർ നൽകിയ വിശദീകരണം. കെ റെയിൽ പോലുള്ള പദ്ധതികൾ കേരളത്തിന്റെ വികസനത്തിന് അനിവാര്യമെന്നാണ് ശശി തരൂരിന്റെ നിലപാട്.
കെ റെയിൽ പദ്ധതിക്കെതിരെ യു ഡി എഫ് എം പിമാർ കേന്ദ്രത്തിന് സമർപ്പിച്ച നിവേദനത്തിൽ ഒപ്പിടാതെ ശശി തരൂർ എംപി മാറി നിന്നത് വലിയ ചർച്ചകൾക്കാമ് വഴിവെച്ചിരിക്കുന്നത്.