മലപ്പുറം: മെട്രോമാൻ ഇ ശ്രീധരനുമായി കൂടിക്കാഴ്ച്ച നടത്തി ബി.ജെ.പി സംസ്ഥാന പ്രസിഡന്റ് കെ.സുരേന്ദ്രൻ. ബി.ജെ.പിക്കൊപ്പം ഇ.ശ്രീധരൻ സജീവമായി ഉണ്ടാവുമെന്ന് കെ സുരേന്ദ്രൻ വ്യക്തമാക്കി. കൂടിക്കാഴ്ച്ചയ്ക്ക് ശേഷം മാദ്ധ്യമങ്ങളോട് പ്രതികരിക്കുകയായിരുന്നു അദ്ദേഹം. ബിജെപിയിൽ പ്രതീക്ഷയുണ്ടെന്ന് ഇ.ശ്രീധരനും വ്യക്തമാക്കി.
ഇനി സജീവ രാഷ്ട്രീയത്തിനില്ലെന്നും കാര്യമായ തിരുത്തലുകൾ വരുത്താതെ ബിജെപിയ്ക്ക് രക്ഷപ്പെടാനാവില്ലെന്നും കഴിഞ്ഞ ദിവസം ഇ ശ്രീധരൻ അഭിപ്രായപ്പെട്ടിരുന്നു. ഇതിനെ തുടർന്നാണ് ഇ ശ്രീധരനുമായി സുരേന്ദ്രൻ കൂടിക്കാഴ്ച്ച നടത്തിയത്. ഇ ശ്രീധരന്റെ പ്രസ്താവനകൾ ബിജെപി നേതൃത്വത്തെ പ്രതിരോധത്തിലാക്കിയിരുന്നു.
ഇ ശ്രീധരൻ എപ്പോഴും പാർട്ടിക്കൊപ്പം ഉണ്ടാകുമെന്നാണ് കെ സുരേന്ദ്രൻ പറയുന്നത്. നിലവിൽ ദേശീയ കൗൺസിലിന്റെ പ്രത്യേക ക്ഷണിതാവാണ് ഇ ശ്രീധരൻ. അദ്ദേഹത്തിന്റെ നിർദ്ദേശങ്ങൾക്കനുസരിച്ചുള്ള തിരുത്തലുകൾ പാർട്ടിയിൽ നടന്നുവരികയാണെന്നും. അദ്ദേഹം സജീവ രാഷ്ട്രീയ പ്രവർത്തകനായിരുന്നില്ല. വിദഗ്ദ്ധന്മാരുടെ പട്ടികയിൽ പെടുത്തിയാണ് സ്ഥാനാർത്ഥിയാക്കിയത് എന്നും സുരേന്ദ്രൻ അറിയിച്ചു.