ഫറ്റോര്‍ഡ: ഇന്ത്യന്‍ സൂപ്പര്‍ ലീഗില്‍ ചെന്നൈയിന്‍ എഫ്സിയെ തോല്‍പ്പിച്ച് മുംബൈ സിറ്റി എഫ്സി. 86-ാം മിനിറ്റില്‍ രാഹുല്‍ ബെഹ്കെയാണ് മുംബൈയുടെ ഗോള്‍ നേടിയത്. മത്സരരത്തില്‍ മുന്‍തൂക്കവും മുംബൈക്ക് തന്നെയായിരുന്നു. ആറ് മത്സരങ്ങളില്‍ 15 പോയിന്റുമായി ഒന്നാം സ്ഥാനത്താണ് മുംബൈ. അഞ്ച് മത്സരങ്ങളില്‍ എട്ട് പോയിന്റുള്ള ചെന്നൈയിന്‍ അഞ്ചാമതാണ്.
15 ഷോട്ടുകളാണ് മുംബൈ തൊടുത്തത്. ഇതില്‍ അഞ്ചും ലക്ഷ്യത്തിലേക്കായിരുന്നു. ഗോള്‍വര കടന്നത് ഒരെണ്ണം മാത്രമാണ്. മറുവശത്ത് ചെന്നൈ ഏഴ് ഷോട്ടുകള്‍ തൊടുത്തു. രണ്ടെണ്ണം മാത്രമാണ് ഗോള്‍ കീപ്പറെ പരീക്ഷിച്ചത്. ഗോള്‍രഹിതമായിരുന്നു ആദ്യ പകുതി. നിലവിലെ ചാംപ്യന്മാരായ മുംബൈ അവസരങ്ങള്‍ നഷ്ടമാക്കുകയും ചെയ്തു. ചെന്നൈയിന്റെ അമിത പ്രതിരോധവും വിലങ്ങുതടിയായി. എന്നാല്‍, 86 -ാം മിനിറ്റില്‍ വിജയഗോളെത്തി. അഹമ്മദ് ജഹൗഹിന്റെ പാസില്‍ തലവച്ച് രാഹുലാണ് വലകുലുക്കിയത്.