പനാജി: നിയമസഭ തെരഞ്ഞെടുപ്പ് നടക്കാനിരിക്കെ ഗോവയിൽ സ്വാധീനം ശക്തമാക്കാനുള്ള തന്ത്രങ്ങളുമായി തൃണമൂൽ കോൺഗ്രസ്. മൊബൈൽ വലിയ പ്രഖ്യാപനങ്ങളാണ് തൃണമൂൽ കോൺഗ്രസ് നടത്തിയിരിക്കുന്നത്. സംസ്ഥാനത്ത് തൃണമൂൽ കോൺഗ്രസ് അധികാരത്തിലെത്തിയാൽ ഗൃഹലക്ഷ്മി പദ്ധതിയിലൂടെ സ്ത്രീകൾക്ക് 5000 രൂപ നൽകുമെന്നാണ് പ്രഖ്യാപനം. പണം സ്ത്രീകളുടെ അക്കൗണ്ടിലേക്ക് നേരിട്ട് ആയിരിക്കും നൽകുക. പദ്ധതിപ്രകാരം വീടുകളിലെ ഗൃഹനാഥനായ സ്ത്രീക്ക് ഈ മാസം 5000 രൂപ ലഭിക്കും.
പശ്ചിമബംഗാളിൽ ഈ പദ്ധതി വിജയകരമായി പരീക്ഷിച്ചതാണെന്നും തൃണമൂൽ കോൺഗ്രസ് അറിയിക്കുന്നു. സാമ്പത്തിക നൊബേൽ പുരസ്കാരം നേടിയ അഭിജിത്ത് ബാനർജിയുടെ പഠനത്തിന്റെ അടിസ്ഥാനത്തിലാണ് പദ്ധതി നടപ്പിലാക്കുന്നത്. സ്ത്രീകളുടെ കയ്യിൽ പണം ലഭിച്ചാൽ അവർക്ക് വസ്ത്രങ്ങളും മരുന്നുകളും വാങ്ങാൻ കഴിയുമെന്നും ഈ പണം സമ്പദ് വ്യവസ്ഥയിലേക്ക് പോകുമെന്നും തൃണമൂൽ എംപി മഹുവാ മൊയ്ത്ര വ്യക്തമാക്കി.
രാജ്യത്തിന്റെ സമ്പത് വ്യവസ്ഥയ്ക്ക് ഊർജ്ജം പകരാനുള്ള മാർഗം പ്രാദേശിക സമ്പദ് വ്യവസ്ഥയിലേക്ക് പണം എത്തിക്കുന്നതാണെന്നും അദ്ദേഹം അഭിപ്രായപ്പെടുന്നു.