കങ്കണ റണാവത്ത് നായികയായെത്തുന്ന ചിത്രം ‘തേജസ്’ 2022 ഒക്ടോബര്‍ 5 ന് തിയേറ്ററുകളിലെത്തും. സായുധ സേനയുടെ പതാക ദിനത്തെ അനുസ്മരിച്ചാണ് ആര്‍എസ്വിപി മൂവീസ് തേജസിന്റെ റിലീസ് തിയ്യതി പ്രഖ്യാപിച്ചത്.
2016-ല്‍ ഇന്ത്യന്‍ വ്യോമസേനയില്‍ ആദ്യമായി യുദ്ധ റോളില്‍ പ്രവേശിച്ച സ്ത്രീകളില്‍ നിന്ന് പ്രചോദനം ഉള്‍ക്കൊണ്ട ചിത്രമാണ് സര്‍വേഷ് മേവാര രചനയും സംവിധാനവും നിര്‍വഹിച്ച തേജസ്. തേജസ് ഗില്‍ എന്നാണ് ചിത്രത്തിലെ കങ്കണയുടെ കഥാപാത്രത്തിന്റെ പേര്.
നമ്മുടെ രാജ്യത്തെ ഭീകരതയില്‍ നിന്ന് സുരക്ഷിതമാക്കാന്‍ നമ്മുടെ സേനകള്‍ ഏറ്റെടുക്കുന്ന ഏറ്റവും വെല്ലുവിളി നിറഞ്ഞ ചില പോരാട്ട ദൗത്യങ്ങളാണ് ചിത്രത്തിന്റെ പ്രമേയം. ഈ വര്‍ഷം നവംബറിലാണ് തേജസ് പൂര്‍ത്തിയാക്കിയത്. അന്‍ഷുല്‍ ചൗഹാന്‍, വരുണ്‍ മിത്ര, സങ്കല്‍പ് ഗുപ്ത എന്നിവരും ചിത്രത്തിലുണ്ട്. ധക്കഡ്, മണികര്‍ണിക റിട്ടേണ്‍സ്: ദി ലെജന്‍ഡ് ഓഫ് ദിദ്ദ എന്നിവയാണ് കങ്കണയുടെ ഇനി വരാനിരിക്കുന്ന ചിത്രങ്ങള്‍.