ഗോവ: ഐഎസ്എല്ലില് ചെന്നൈയിന് എഫ്സിയെ ഗോള്രഹിത സമനിലയില് പൂട്ടി ഈസ്റ്റ് ബംഗാള് എഫ്സി. രണ്ട് ടീമുകളും പ്രതിരോധത്തിലൂന്നി കളിച്ചപ്പോള് മത്സരത്തില് ഗോളുകളൊന്നും പിറന്നില്ല. ചെന്നൈയിന് എഫ് സി നിരവധി ഗോളവസരങ്ങള് സൃഷ്ടിച്ചെങ്കിലും ഈസ്റ്റ് ബംഗാളിന്റെ പ്രതിരോധ മതിലില് തട്ടി അതെല്ലാം തകര്ന്നു വീഴുകയായിരുന്നു.
പ്രതിരോധനിരയില് സുവം സെന്നിന്റെ പ്രകടനമാണ് കരുത്തരായ ചെന്നൈയിനെ പിടിച്ചു കെട്ടാന് ഈസ്റ്റ് ബംഗാളിനെ സഹായിച്ചത്. ആദ്യ പകുതിയില് പൂര്ണമായും പ്രതിരോധത്തിലായ ഈസ്റ്റ് ബംഗാള് രണ്ടാം പകുതിയില് കുറച്ചു കൂടി ആക്രമണോത്സുകമായി കളിച്ചുവെങ്കിലും അതൊന്നും ഗോളിലേക്ക് എത്തിയില്ല. 75-ാം മിനിറ്റില് സുവര്ണാവസരം ഈസ്റ്റ് ബംഗാള് നഷ്ടമാക്കുകയും ചെയ്തു. ആമിര് ഡെര്സിവിച്ച് നല്കിയ ക്രോസില് തലവെക്കാന് രാജു ഗെയ്ക്വാദ് പരാജയപ്പെട്ടതാണ് ഈസ്റ്റ് ബംഗാളിന്റെ വിജയ സാധ്യത അടഞ്ഞത്.
മത്സരത്തിന്റെ അവസാനം വരെ ആധിപത്യം പുലര്ത്തിയിട്ടും ഫിനിഷിംഗിലെ പോരായ്മ ചെന്നൈയിന് തിരിച്ചടിയായി. സമനിലയായെങ്കിലും സീസണില് തോല്വിയറിയാത്ത ടീമെന്ന റെക്കോര്ഡ് നിലനിര്ത്താന് ചെന്നൈയിനായി. മൂന്ന് കളികളില് ഏഴ് പോയന്റുമായി പോയന്റ് പട്ടികയില് ഒന്നാം സ്ഥാനത്താണ് ചെന്നൈയിന്.