കൊച്ചി: പാലാരിവട്ടത്ത് വാഹനാപകടത്തിൽ മോഡലുകൾ മരിക്കാനിടയായ സംഭവത്തിൽ നിർണായക വഴിത്തിരിവ്. ഇവരുടെ കാറിനെ പിന്തുടർന്ന ഔഡി കാറിന്റെ ഡ്രൈവർ സൈജു തങ്കച്ചൻ അറസ്റ്റിലായി.
അൻസിയെയും സുഹൃത്തുക്കളെയും ഇയാൾ ഹോട്ടലിൽ നിന്ന് കാറിൽ പിന്തുടർന്നിരുന്നെന്ന് നേരത്തേ തന്നെ കണ്ടെത്തിയിരുന്നു. മണിക്കൂറുകൾ നീണ്ട ചോദ്യംചെയ്യലിനു ശേഷം വെള്ളിയാഴ്ച്ചയാണ് ജില്ലാ ക്രൈംബ്രാഞ്ച് സംഘം സൈജുവിനെ അറസ്റ്റ് ചെയ്തത്. ദുരുദ്ദേശത്തോടെ സ്ത്രീകളെ പിന്തുടർന്ന് ശല്യപ്പെടുത്തിയെന്ന കുറ്റമാണ് ഇയാൾക്കെതിരെ ചുമത്തിയിരിക്കുന്നത്. അപകടത്തിന് കാരണമായെന്ന കുറ്റവും ഇയാൾക്കെതിരെ ചുമത്തിയിട്ടുണ്ട്. ഇയാൾക്കെതിരെ വഞ്ചനാ കുറ്റത്തിന് മറ്റൊരു കേസും നിലനിൽക്കുന്നുണ്ടെന്ന് പോലീസ് അറിയിച്ചു.
പോലീസ് ചോദ്യം ചെയ്യാൻ വിളിച്ചതിന് ശേഷം ഇയാൾ ഒളിവിൽ പോയിരിക്കുകയായിരുന്നു. മുൻകൂർ ജാമ്യാപേക്ഷയും ഇയാൾ നൽകിയിരുന്നു. പിന്നീട് പോലീസ് നടപടികൾ കർശനമാക്കിയതിനെ തുടർന്ന് ഇയാൾ അഭിഭാഷകനോടൊപ്പം പോലീസിന് മുന്നിൽ ഹാജരാകുകയായിരുന്നു.