ന്യൂഡല്ഹി: കൊവിഡ് പ്രതിസന്ധിയില് വലഞ്ഞ ജനങ്ങള്ക്ക് ആശ്വാസം പകരാന് കേന്ദ്രസര്ക്കാര് പ്രഖ്യാപിച്ച ഗരീബ് കല്യാണ് അന്നയോജന പദ്ധതി മാര്ച്ച് വരെ നീട്ടി.
കൊവിഡ് വ്യാപനത്തിന്റെ തുടക്കത്തിലാണ് പാവപ്പെട്ടവര്ക്ക് ഭക്ഷ്യധാന്യം ഉറപ്പാക്കാന് കേന്ദ്ര സര്ക്കാര് പ്രധാനമന്ത്രി ഗരീബ് കല്യാണ് അന്നയോജന പദ്ധതി പ്രഖ്യാപിച്ചത്. മാസം അഞ്ചുകിലോ വീതം ഭക്ഷ്യധാന്യം പാവപ്പെട്ടവരുടെ ഇടയില് സൗജന്യമായി വിതരണം ചെയ്യുന്നതാണ് പദ്ധതി. 80 കോടി ഗുണഭോക്താക്കള്ക്ക് ഗുണം ചെയ്യുന്ന പദ്ധതി വിവിധ ഘട്ടങ്ങളിലായി നവംബര് 30 വരെ നേരത്തെ നീട്ടിയിരുന്നു.
കൊവിഡ് വ്യാപനം കുറയുകയും സമ്പദ് വ്യവസ്ഥ പൂര്വ്വ സ്ഥിതിയിലേക്ക് മാറുകയും ചെയ്യുന്ന പശ്ചാത്തലത്തില് പദ്ധതി നീട്ടില്ലെന്നായിരുന്നു സൂചന. എന്നാല്, പദ്ധതിയുടെ കാലാവധി വീണ്ടും നീട്ടാന് കേന്ദ്ര മന്ത്രിസഭാ യോഗം തീരുമാനിക്കുകയായിരുന്നു. തുടര്ന്നും നീട്ടുമോ എന്നതിനെ സംബന്ധിച്ച ചര്ച്ചകള് നടക്കുന്നതിനിടെ, പദ്ധതി നീട്ടുന്നതുമായി ബന്ധപ്പെട്ട് ഒരു നിര്ദ്ദേശവും സര്ക്കാരിന്റെ മുന്നില് ഇല്ലെന്ന കേന്ദ്ര ഭക്ഷ്യ സെക്രട്ടറിയുടെ വാക്കുകള് നേരത്തെ വലിയ വാര്ത്തയായിരുന്നു. തിരഞ്ഞെടുപ്പു മുന്നില് കണ്ടാണ് ഇപ്പോഴത്തെ നീക്കമെന്ന സൂചനകളുണ്ട്.