തിരുവനന്തപുരം: മുല്ലപ്പെരിയാര്‍ വിഷയത്തില്‍ മുഖ്യമന്ത്രി മൗനം പാലിക്കുകയാണെന്ന കെപിസിസി പ്രസിഡന്റ് കെ. സുധാകരന്റെ ആരോപണത്തിന് മറുപടിയുമായി സിപിഎം കേന്ദ്ര കമ്മിറ്റിയംഗം എ.കെ ബാലന്‍. സുധാകരന്റെ പ്രസ്താവന തെറ്റിദ്ധാരണ പരത്താനുള്ളതാണെന്ന് എ.കെ ബാലന്‍ കുറ്റപ്പെടുത്തി.
തമിഴ്നാടിന് വെള്ളം, കേരളത്തിന് സുരക്ഷ എന്നത് നിരവധി തവണ മുഖ്യമന്ത്രി വ്യക്തമാക്കിയിട്ടുള്ളതാണ്. ഭരണതലത്തില്‍ അന്വേഷണം നടക്കുന്നുണ്ടെന്നും, ഇതുമായി ബന്ധപ്പെട്ട് ഒരു ഉയര്‍ന്ന ഉദ്യോഗസ്ഥനെ സസ്‌പെന്‍ഡ് ചെയ്തിട്ടുണെന്നും ബാലന്‍ പറഞ്ഞു.
പുതിയ ഡാം പണിയുന്നത് വരെ സമരം നടത്തുമെന്നാണ് യു.ഡി.എഫ് പറയുന്നത്. കേന്ദ്ര സര്‍ക്കാരിന്റെ അനുമതിയില്ലാതെ അവിടെ ഒരു കല്ലിടാന്‍ പോലും കഴിയില്ല. കേന്ദ്രത്തിനെതിരായ ജനവികാരത്തെ എല്‍.ഡി.എഫിനെതിരാക്കാന്‍ ശ്രമിക്കുകയാണ് കോണ്‍ഗ്രസ് എന്നും ബാലന്‍ ചൂണ്ടിക്കാട്ടി.