നീണ്ട 28 വര്‍ഷങ്ങള്‍ക്ക് ശേഷം പ്രിയദര്‍ശനും ഉര്‍വശിയും വീണ്ടും ഒന്നിക്കുന്നു. 1993ല്‍ റിലീസ് ചെയ്ത മിഥുനം സിനിമയില്‍ നായികാ കഥാപാത്രത്തെ അവതരിപ്പിച്ചതിന് ശേഷം ഉര്‍വശി പ്രിയദര്‍ശന്‍ ചിത്രത്തില്‍ അഭിനയിച്ചിട്ടില്ല. എന്നാല്‍, വര്‍ഷങ്ങള്‍ക്ക് ശേഷമുള്ള ഈ കൂടിച്ചേരല്‍ ഒരു തമിഴ് സിനിമക്ക് വേണ്ടിയാണ്.
പ്രിയദര്‍ശന്‍ സംവിധാനം ചെയ്യുന്ന ‘ അപ്പത ‘ എന്ന ചിത്രത്തിലാണ് ഉര്‍വശി അഭിനയിക്കുന്നത്. ഉര്‍വശിയുടെ എഴുന്നൂറാം ചിത്രമെന്ന പ്രത്യേകതയും ഈ ചിത്രത്തിനുണ്ട്. ഉര്‍വശിക്കൊപ്പമുള്ള ഫോട്ടോ പങ്കുവച്ച് പ്രിയന്‍ തന്നെയാണ് ഇക്കാര്യങ്ങള്‍ വെളിപ്പെടുത്തിയത്. ‘മിഥുനം കഴിഞ്ഞ് ഏറെ നാളുകള്‍ക്കു ശേഷമുള്ള ഒത്തുചേരല്‍. വരാനിരിക്കുന്ന തമിഴ് ചിത്രമായ ‘അപ്പത’യില്‍ വീണ്ടും ഒന്നിക്കുന്നു.’-പ്രിയന്‍ കുറിച്ചു.
1993ലാണ് മിഥുനം റിലീസാവുന്നത്. ബോക്സ് ഓഫീസില്‍ വലിയ ചലനം സൃഷ്ടിക്കന്‍ ചിത്രത്തിനായില്ലെങ്കിലും മിനി സ്‌ക്രീനില്‍ സംപ്രേക്ഷണത്തിനെത്തുമ്പോഴെല്ലാം ചിത്രത്തിന് പ്രേക്ഷകരുണ്ട്. മരക്കാറിന് ശേഷം പ്രിയദര്‍ശന്‍ ഒരുക്കുന്ന സിനിമയാണ് ‘അപ്പത’. മരക്കാര്‍ ഡിസംബര്‍ രണ്ടിന് തിയേറ്ററുകളില്‍ എത്താനിരിക്കുകയാണ്. ‘വരനെ ആവശ്യമുണ്ട്’ എന്ന ചിത്രമാണ് ഊര്‍വശിയുടേതായി മലയാളത്തില്‍ അവസാനം റിലീസിനെത്തിയത്. ‘കേശു ഈ വീടിന്റെ നാഥന്‍’ എന്ന സിനിമയാണ് അടുത്തതായി ഇറങ്ങാനിരിക്കുന്നത്.