അൽബെനി: ന്യൂയോർക്കിൽ അതിശക്തമായ മഴയും കാറ്റും. ഐഡ ചുഴലിക്കാറ്റിനെത്തുടർന്നുണ്ടായ അതിശക്തമായ മഴയിലും വെള്ളപ്പൊക്കത്തിലും 46 പേരാണ് ന്യൂയോർക്കിൽ മരിച്ചത്. നഗരത്തിൽ മിക്കയിടങ്ങളിലും വെള്ളക്കെട്ട് രൂക്ഷമാണ്. ഇതുമൂലം സബ്വേകൾ അടച്ചതായി അധികൃതർ അറിയിച്ചു.
ന്യൂയോർക്കിൽ നിന്നുള്ള നൂറ് കണക്കിന് വിമാന സർവീസുകളും റദ്ദാക്കിയിട്ടുണ്ട്. വെള്ളം കയറിയതോടെ പ്രധാനപ്പെട്ട പല റോഡുകളും അടച്ചു. കഴിഞ്ഞ അമ്പത് വർഷത്തിനിടെ ഇത്രയും കനത്ത മഴ ഉണ്ടായിട്ടില്ലെന്നാണ് പ്രദേശവാസികൾ വ്യക്തമാക്കുന്നത്.
കനത്ത മഴയെ തുടർന്ന് മിക്ക വീടുകളിലും വെള്ളം കയറി. വീടുകൾക്കുള്ളിൽ കുടുങ്ങിയ ആളുകളെ രക്ഷാപ്രവർത്തകരെത്തി പുറത്തെത്തിച്ചു. ന്യൂജേഴ്സിയിൽ മാത്രം 23 പേരാണ് മരണപ്പെട്ടതെന്ന് ഗവർണർ ഫിൽ മർഫി പറഞ്ഞു. ഇതിൽ കൂടുതൽ പേരും വാഹനങ്ങൾക്കുള്ളിൽ കുടുങ്ങിപ്പോയവരാണെന്നും അദ്ദേഹം അറിയിച്ചു. താഴ്ന്ന പ്രദേശങ്ങളിലുള്ളവരോട് മാറി താമസിക്കാനാണ് അധികൃതർ നൽകിയിരിക്കുന്ന മുന്നറിയിപ്പ്. ലൂസിയാനുൾപ്പടെയുള്ള പ്രദേശങ്ങളിൽ വ്യാപക നാശനഷ്ടമാണ് ഉണ്ടായത്.