കൊച്ചി: മുട്ടിൽ മരംമുറി കേസ് സിബിഐ അന്വേഷിക്കേണ്ടതില്ലെന്ന് ഹൈക്കോടതി. കേസ് സിബിഐയ്ക്ക് കൈമാറേണ്ടതില്ലെന്ന് കോടതി ഉത്തരവിട്ടു. പൊതുതാൽപര്യ ഹർജിയിലെ ആവശ്യം തീർപ്പാക്കവെയാണ് ഹൈക്കോടതി ഇക്കാര്യം വ്യക്തമാക്കിയത്.
മുട്ടിൽ കേസിന്റെ ഫലപ്രദമായ അന്വേഷണത്തിന് കോടതി മാർഗരേഖ പുറപ്പെടുവിക്കുകയും ചെയ്തു. തൃശൂർ സ്വദേശി ജോർജ് വട്ടുകുളമാണ് ഹൈക്കോടതിയിൽ പൊതുതാത്പര്യ ഹർജി സമർപ്പിച്ചത്. നിലവിലെ അന്വേഷണം തൃപ്തികരമാണെന്നും, ഈ ഘട്ടത്തിൽ ഇടപെടേണ്ടതില്ലെന്നും ഹൈക്കോടതി അറിയിച്ചു. അന്വേഷണത്തിന് ഭാവിയിൽ വീഴ്ചകളുണ്ടായാൽ പൊതുജനത്തിന് കോടതിയെ സമീപിക്കാമെന്നും കോടതി കൂട്ടിച്ചേർത്തു.