അക്ഷയ് കുമാര് നായകനായെത്തുന്ന ബോളിവുഡ് ചിത്രം ‘ബെല്ബോട്ട’ത്തിന്റെ വ്യാജപതിപ്പ് റിലീസ് ദിനത്തില് തന്നെ ചോര്ന്നു. ചിത്രത്തിന്റെ എച്ച്ഡി നിലവാരമുള്ള പ്രിന്റുകള് പല പൈറേറ്റഡ് സൈറ്റുകളിലൂടെ പുറത്തായിട്ടുണ്ട്.
കൊവിഡ് രണ്ടാംതരംഗത്തിനു ശേഷം തിയേറ്റര് റിലീസ് ചെയ്യുന്ന ആദ്യ ബോളിവുഡ് ചിത്രമാണ് ബെല്ബോട്ടം. അതുകൊണ്ട് തന്നെ ഏറെ പ്രതീക്ഷയോടെയായിരുന്നു തിയറ്റര് ഉടമകള് സിനിമയ്ക്കായി കാത്തിരുന്നത്. ഇതിന് അടിയായാണ് ഇപ്പോള് വ്യാജപതിപ്പ് ഓണ്ലൈനില് പ്രചരിച്ചുകൊണ്ടിരിക്കുന്നത്.
രഞ്ജിത്ത് എം തിവാരി സംവിധാനം ചെയ്തിരിക്കുന്ന ചിത്രം സ്പൈ ആക്ഷന് ത്രില്ലര് വിഭാഗത്തില് പെടുന്ന ഒന്നാണ്. എണ്പതുകള് പശ്ചാത്തലമാക്കുന്ന ചിത്രത്തില് വാണി കപൂര് ആണ് നായിക. ഹുമ ഖുറേഷിയും ലാറ ദത്തയും മറ്റു രണ്ട് പ്രധാന കഥാപാത്രങ്ങളെ അവതരിപ്പിക്കുന്നു.
ഡെന്സില് സ്മിത്ത്, അനിരുദ്ധ ദവെ, ആദില് ഹുസൈന്, തലൈവാസല് വിജയ് തുടങ്ങിയ താരനിരയും ചിത്രത്തില് അണിനിരക്കുന്നുണ്ട്.