കൊല്ക്കത്ത: ബോളിവുഡ് താരം ഷാരുഖ് ഖാന്റെ മകള് സുഹാന ഖാന് വെള്ളിത്തിരയില് അരങ്ങേറ്റത്തിന് ഒരുങ്ങുന്നുവെന്ന് റിപ്പോര്ട്ടുകള്. പ്രമുഖ സംവിധായിക സോയ അക്തറിന്റെ സിനിമയിലൂടെ സുഹാന സിനിമാ തുടക്കം കുറിക്കുന്നുവെന്നാണ് റിപ്പോര്ട്ടുകള്.
‘ആര്ച്ചി’ എന്ന ലോകമെമ്പാടും ആരാധകരുള്ള കോമിക്ക് ബുക്കിനെ ആസ്പദമാക്കിയുള്ളതായിരിക്കും ഈ ചിത്രം. സുഹൃത്തുക്കളായ ഒരുകൂട്ടം ഹൈസ്കൂള് വിദ്യാര്ഥികളുടെ കഥയാണ് ചിത്രം പറയുന്നത്. പ്രമുഖ ഒ ടി ടി പ്ലാറ്റ്ഫോമായ നെറ്റ്ഫ്ളിക്സിന് വേണ്ടിയായിരിക്കും ചിത്രം ഒരുക്കുന്നത്.
ടീനേജ് റൊമാന്റിക് കോമഡി വിഭാഗത്തില് പെടുന്ന ചിത്രത്തില് ഒരു പ്രധാന കഥാപാത്രത്തെ അവതരിപ്പിക്കുന്നത് സുഹാന തന്നെയായിരിക്കുമെന്നാണ് റിപ്പോര്ട്ടുകള് ചൂണ്ടിക്കാട്ടുന്നത്.
നേരത്തെ, ലണ്ടനില് നടന്ന ഒരു ‘റോമിയോ ആന് ഡ് ജൂലിയറ്റ്’ നാടകത്തിലും ‘ദി ഗ്രേ പാര്ട്ട് ഓഫ് ബ്ലൂ’ എന്ന ഹ്രസ്വചിത്രത്തിലും സുഹാന അഭിനയിച്ചിട്ടുണ്ട്. തിയഡോര് ഗിമെറോ സംവിധാനം ചെയ്ത ഈ പത്ത് മിനിറ്റ് ഷോര്ട്ട് ഫിലിമിലെ അഭിനയം സുഹാനയ്ക്ക് ഏറെ അഭിനന്ദനങ്ങള് നേടിക്കൊടുത്തിരുന്നു.