മോസ്കോ: യുക്രൈനിലെ യുദ്ധം അവസാനിപ്പിക്കാന് റഷ്യ ആഗ്രഹിക്കുന്നുവെന്നും അതിനായി ഒരു നയതന്ത്ര പരിഹാരം കാണുമെന്നും പ്രസിഡന്റ് വ്ലാദിമിര് പുതിന് മാധ്യമപ്രവര്ത്തകരോട് പ്രതികരിച്ചു. ‘അധികം വൈകാതെ യുദ്ധം അവസാനിപ്പിക്കുകയാണ് ഞങ്ങളുടെ ലക്ഷ്യം. എല്ലാ സായുധ പോരാട്ടങ്ങളും എതെങ്കിലും വിധത്തിലുള്ള നയതന്ത്ര കൂടിയാലോചനകള്ക്കൊടുവിലാണ് അവസാനിച്ചിട്ടുള്ളത്. അതിന് ഏതെങ്കിലും കക്ഷികള് ഇരുന്ന് ഉടമ്പടി ഉണ്ടാക്കാന് തയ്യാറാവണം. അതിന് നമ്മുടെ എതിരാളികള് എത്രവേഗം തയ്യാറാവുന്നുവോ അത്രയും നല്ലത്’- അദ്ദേഹം വ്യക്തമാക്കി.
അതേസമയം, നല്കിവരുന്ന പിന്തുണ തുടരുമെന്ന് അമേരിക്കന് പ്രസിഡന്റ് ജോ ബൈഡന് യുക്രൈന് പ്രസിഡന്റ് വ്ലാദിമിര് സെലന്സ്കിയ്ക്ക് ഉറപ്പുനല്കിയിരുന്നു. ഇതിന് പിന്നാലെയാണ് യുദ്ധം അവസാനിപ്പിക്കുന്നതിനെ കുറിച്ച് പുതിന്റെ പ്രസ്താവന.
എന്നാല്, കൂടിയാലോചന നടത്തുന്ന കാര്യം ഗൗരവത്തോടെയാണോ റഷ്യ കാണുന്നതെന്ന് സംശയമുണ്ടെന്ന് യുഎസ് പറയുന്നു. ഗൗരവത്തോടെയാണെങ്കില് തുറന്ന ചര്ച്ചയ്ക്ക് യുഎസ് തയ്യാറാണെന്ന് വൈറ്റ് ഹൗസ് വക്താവ് ജോണ് കിര്ബി പറഞ്ഞു. യുക്രൈനില് നിന്നും കനത്ത തിരിച്ചടി നേരിട്ട സാഹചര്യത്തില് കൂടുതല് സമയം ലഭിക്കുന്നതിന് വേണ്ടിയുള്ള തന്ത്രത്തിന്റെ ഭാഗമായാണ് പുതിന്റെ നയതന്ത്ര ചര്ച്ചാ നീക്കമെന്ന് യുക്രൈനും സഖ്യരാജ്യങ്ങളും സംശയിക്കുന്നുമുണ്ട്.