തിരുവനന്തപുരം: കെഎസ്ആർടിസിയിലെ ശമ്പള- പെൻഷൻ പ്രതിസന്ധി ചർച്ച ചെയ്യാൻ വേണ്ടി മന്ത്രിതല യോഗം വിളിച്ച് മുഖ്യമന്ത്രി പിണറായി വിജയൻ. ബുധനാഴ്ച്ചയാണ് യോഗം ചേരുക. ഗതാഗത മന്ത്രി ആന്റണി രാജുവും ധനമന്ത്രി കെ എൻ ബാലഗോപാലും ഉൾപ്പെടെയുള്ളവർ യോഗത്തിൽ പങ്കെടുക്കും. പ്രതിപക്ഷ ഭരണപക്ഷ ട്രേഡ് യൂണിയനുകൾ പണിമുടക്ക് പ്രഖ്യാപിച്ച സാഹചര്യത്തിലാണ് പുതിയ നീക്കം.
മൂന്ന് അംഗീകൃത ട്രേഡ് യൂണിയനുകളും സൂചനാ പണിമുടക്ക് പ്രഖ്യാപിച്ചിരിക്കുകയാണ്. പ്രതിപക്ഷ ട്രേഡ് യൂണിയനായ ടിഡിഎഫ് നവംബർ 5,6 തീയതികളിലും എംപ്ളോയീസ് സംഘ് നവംബർ 5 നും പണിമുടക്ക് നടത്തുമെന്നാണ് അറിയിച്ചിരിക്കുന്നത്. ഭരണാനുകൂല സംഘടനയായ എംപ്ളോയീസ് അസോസിയേഷൻ നവംബർ 5 നാണ് പണിമുടക്ക് പ്രഖ്യാപിച്ചിരിക്കുന്നത്.
കെഎസ്ആർടിസിയിൽ ഈ മാസത്തെ പെൻഷൻ ഇതുവരെ വിതരണം ചെയ്തിട്ടില്ല. പെൻഷൻ വിതരണം ചെയ്ത വകയിൽ സഹകരണ ബാങ്കുകൾക്ക് സർക്കാരിൽ നിന്ന് മൂന്നു മാസത്തെ കുടിശ്ശികയും ലഭിക്കാനുണ്ട്. ഇത് ലഭിക്കാതെ സാഹചര്യത്തിൽ പെൻഷനുള്ള തുക നൽകാനാകില്ലെന്നാണ് സഹകരണ ബാങ്കുകൾ പറയുന്നത്. അതേസമയം പണം കണ്ടെത്താനുള്ള നടപടികൾ പുരോഗമിക്കുകയാണെന്നാണ് ധനവകുപ്പ് നൽകുന്ന വിശദീകരണം.