ന്യൂഡൽഹി: പഞ്ചാബ് മുഖ്യമന്ത്രി അമരീന്ദർ സിംഗ് രാജി വെയ്ക്കാനൊരുങ്ങുന്നതായി റിപ്പോർട്ട്. നിയമസഭാ തിരഞ്ഞെടുപ്പിന് മാസങ്ങൾ മാത്രം ശേഷിക്കെയാണ് അമരീന്ദർ സിംഗ് രാജിക്കൊരുങ്ങുന്നതായുള്ള വാർത്തകൾ പുറത്തു വരുന്നത്. പാർട്ടിക്കുള്ളിൽ നിന്നു തന്നെ അപമാനം സഹിച്ച് തുടരാൻ സാധിക്കില്ലെന്ന് അമരീന്ദർ സിംഗ് കോൺഗ്രസ് ദേശീയ അദ്ധ്യക്ഷ സോണിയ ഗാന്ധിയെ അറിയിച്ചുവെന്നാണ് പാർട്ടി വൃത്തങ്ങൾ നൽകുന്ന വിവരം.
കോൺഗ്രസ് എം എൽ എമാരിൽ നിന്നും അടിക്കടി അപമാനം നേരിടേണ്ടി വരുന്നത് തനിക്ക് ക്ഷീണമാണെന്നും അതിനാൽ താൻ മുഖ്യമന്ത്രി സ്ഥാനം ഒഴിയുകയാണെന്നും അമരീന്ദർ സോണിയാ ഗാന്ധിയെ അറിയിച്ചതായാണ് സൂചന.
അതേസമയം കഴിഞ്ഞ ദിവസം ചേർന്ന പഞ്ചാബിലെ കോൺഗ്രസ് എംഎൽഎമാരുടെ യോഗത്തിൽ അമരീന്ദർ സിംഗ് മുഖ്യമന്ത്രി സ്ഥാനത്തു നിന്ന് മാറിനിൽക്കണമെന്ന ആവശ്യമുയർന്നിരുന്നുവെന്ന റിപ്പോർട്ടുകളും പുറത്തു വന്നിരുന്നു. ഇത് മൂന്നാം തവണയാണ് കോൺഗ്രസ് എം എൽ എമാർ യോഗം ചേർന്ന് അമരീന്ദറിന്റെ രാജി ആവശ്യപ്പെടുന്നത്.