തിരുവനന്തപുരം : മുഖ്യമന്ത്രി പിണറായി വിജയനെതിരെ ആഞ്ഞടിച്ച് കെപിസിസി അധ്യക്ഷൻ കെ സുധാകരൻ. പിണറായി വിജയൻ ജയിലിൽ പോകാത്തത് ബിജെപിയുമായുള്ള അന്തർധാര മൂലമാണെന്ന് അദ്ദേഹം പറഞ്ഞു. കോൺഗ്രസിന്റെ സമരാഗ്നി ജനകീയ പ്രക്ഷോഭ യാത്രയ്ക്ക് മട്ടന്നൂരിൽ ലഭിച്ച സ്വീകരണ യോഗത്തിൽ സംസാരിക്കവെയായിരുന്നു കെ സുധാകരന്റെ പരാമർശം. മുഖ്യമന്ത്രി പിണറായി വിജയൻ പ്രധാനമന്ത്രി നരേന്ദ്രമോദിയെ തലകുനിച്ച് തൊഴുത് സ്വീകരിക്കുന്നത് തല പോകാതിരിക്കാനാണെന്നും അദ്ദേഹം പരിഹസിച്ചു.
ഡോളർ കടത്ത്, സ്വർണ്ണ കടത്ത് കേസുകളിൽ അന്വേഷണം മുഖ്യമന്ത്രിയിലേക്ക് എത്താത്തത് ബിജെപിയുമായി ഉണ്ടാക്കിയ ധാരണ പ്രകാരമാണ്. കള്ളപ്പണം പിടിച്ച കേസിൽ ബിജെപി സംസ്ഥാന പ്രസിഡന്റിനെതിരെ അന്വേഷണം ഇല്ലാത്തതും ഇതിന് തെളിവാണെന്ന് അദ്ദേഹം ചൂണ്ടിക്കാട്ടി.