കമൽഹാസന്റെ എക്കാലത്തെയും മികച്ച സിനിമകളിൽ ഒന്നായ ‘നായകൻ’ വർഷങ്ങൾക്ക് ശേഷം തിയേറ്ററുകളിലേക്ക് തിരിച്ചു വരുന്നു. സിനിമ റിലീസ് ആയി 36 വർഷം കഴിഞ്ഞു.ഡിജിറ്റൽ സാങ്കേതിക വിദ്യ ഉപയോഗിച്ച് നവീകരിച്ച സിനിമ നവംബർ 3 തീയേറ്ററുകളിൽ റീറിലീസ് ചെയ്യുന്നതാണ്. സിനിമയുടെ ശബ്ദ വിന്യാസത്തിലും നിറത്തിലും പുതിയ കാലത്തിന് അനുസരിച്ച് മാറ്റം വരുത്തിയാകും പുറത്തിറങ്ങുക എന്നാണ് അണിയറ പ്രവർത്തകർ അറിയിച്ചത്.
രാജ്യമാകെ 280 തീയേറ്ററുകൾ ആണ് നായകൻറെ തിരിച്ചു വരവിന് ആയി തയ്യാറായിരിക്കുന്നത്, അതിൽ തമിഴ് നാട്ടിൽ മാത്രം 120 തീയേറ്ററുകളും 60 തീയേറ്ററുകൾ കേരളത്തിലുമുണ്ട്.1987 ൽ മണിരത്നത്തിന്റെ സംവിധാന മികവിൽ പുറത്തിറങ്ങിയ ചിത്രത്തിൽ കമൽഹാസൻ, വേലു നായ്കർ എന്ന കഥാപാത്രത്തെ ആണ് അവതരിപ്പിച്ചത്. 35 മത്തെ ദേശീയ ചലച്ചിത്ര അവാർഡിൽ 3 അവാർഡുകൾ ചിത്രം നേടിയിരുന്നു.
ഈ ചിത്രത്തിലെ അഭിനയത്തിന് പിന്നീട് മികച്ച നടനുള്ള ദേശീയ അവാർഡ് വരെ കമൽ ഹാസൻ നേടിയിരുന്നു.മികച്ച ഛായാഗ്രാഹകനുള്ള പുരസ്കാരം പി.സി. ശ്രീറാമിനും കലാസംവിധായകനുള്ള പുരസ്കാരം തോട്ടാധരണിക്കും ചിത്രം നേടിക്കൊടുത്തു.
ശരണ്യ പൊൻവണ്ണൻ, ജനകരാജ്, ഡൽഹി ഗണേഷ്, നാസർ, നിഴൽകൾ രവി തുടങ്ങിയവരാണ് മറ്റു അഭിനേതാക്കൾ.ഇളയരാജയാണ് സംഗീതം ചെയ്ത നായകൻ 1988-ലെ മികച്ച വിദേശ ഭാഷാ ചിത്രത്തിനുള്ള അക്കാദമി അവാർഡിനുള്ള ഇന്ത്യയുടെ ഔദ്യോഗിക സമർപ്പണം കൂടിയായിരുന്നു, എന്നാൽ അന്തിമ നോമിനികളിൽ ഇത് ഷോർട്ട്ലിസ്റ്റ് ചെയ്യപ്പെട്ടില്ല.