ഗല്വാന് ഉള്പ്പടെ മൂന്നു സംഘര്ഷമേഖലയില്നിന്നും ചൈനീസ് സൈന്യം പിന്മാറ്റം തുടങ്ങിയതായി ദേശീയ മാധ്യമങ്ങള് റിപ്പോര്ട്ട് ചെയ്യുന്നു. ഇരു സേനകൾ തമ്മിലുണ്ടായ ചർച്ചകളിലെ ധാരണ പ്രകാരമാണ് പിൻമാറ്റം.കമാന്ഡര് തലത്തില് നടന്ന മൂന്നാംഘട്ട ചര്ച്ചയുടെ തുടര്ച്ചയായാണ് സേനാ പിന്മാറ്റമെന്നാണ് സൂചന. ഏകദേശം രണ്ടു കിലോമീറ്ററോളം പിൻവാങ്ങിയെന്നാണ് ഔദ്യോഗികമായി സ്ഥിരീകരിക്കാത്ത വിവരം.
നേരത്തേയും ചൈന പിന്മാറിയിരുന്നെങ്കിലും വീണ്ടും ജൂൺ 15 ന് സംഘർഷമുണ്ടാവുകയും 20 സൈനികർ വീരമൃത്യു വരിക്കുകയും ചെയ്തതാണ്. ഈ സാഹചര്യത്തെത്തുടർന്ന് ഇന്ത്യൻ സേന മേഖലയിൽ അതീവ ജാഗ്രത പുലർത്തുന്നുണ്ടെന്ന് പ്രതിരോധ മന്ത്രാലയ വൃത്തങ്ങൾ അറിയിച്ചു.