മൈക്രോ സോഫ്റ്റ് ഇന്ത്യയുടെ പുതിയ സിഇഒ ആയി നവതേജ് ബാലിനെ നിയമിച്ചു. പൊതുമേഖലാ ബിസിനസ്സ് എക്സിക്യൂട്ടീവ് ഡയറക്ടറായി വെങ്കട്ട് കൃഷ്ണൻ ചുമതലയേറ്റതോടെയാണ് നവതേജ് ബാലിനെ സിഇഓ ആയി നിയമിച്ചത്. മൈക്രോ സോഫ്റ്റ് ഇന്ത്യയുടെ പ്രസിഡന്റ് ആനന്ദ് മഹേശ്വരി ഇന്നലെയാണ് രാജിവെച്ചത്. പ്രസിഡന്റിന്റെ രാജി കമ്പനി സ്ഥിരീകരിച്ചതായി ഇക്കണോമിക് ടൈംസ് റിപ്പോർട്ട് ചെയ്തു.
കമ്പനിയുടെ ഉയർന്ന ഉദ്യോഗസ്ഥർക്കിടയിൽ മാറ്റങ്ങൾക്കിടയാക്കുന്നതാണ് രാജി. ‘ആനന്ദ് മൈക്രോസോഫ്റ്റ് വിടുന്ന കാര്യം തങ്ങൾ സ്ഥിരീകരിക്കുന്നുവെന്നും കമ്പനിയുടെ പുറത്തുള്ള മറ്റൊരു ചുമതല ഏറ്റെടുക്കാനാണ് അദ്ദേഹം പോകുന്നതെന്നും മൈക്രോസോഫ്റ്റ് വക്താവ് പറഞ്ഞു. ഇന്ത്യയിൽ നമ്മുടെ ബിസിനസിന് അദ്ദേഹം നൽകിയ സംഭാവനകൾക്ക് നന്ദി പറയുന്നതായും ഭാവി പ്രവർത്തനങ്ങൾക്ക് വിജയാശംസകൾ നേരുന്നതായും അദ്ദേഹം പ്രസ്താവനയിൽ പറഞ്ഞു.