കോട്ടയം: തൃണമൂൽ കോൺഗ്രസ് എം പി മഹുവ മൊയ്ത്രയ്ക്ക് ഒപ്പമുള്ള ചിത്രങ്ങൾ പ്രചരിപ്പിക്കപ്പെട്ട സംഭവത്തിൽ പ്രതികരിച്ച് ശശി തരൂർ. തന്റെ സഹോദരിയടക്കം 15-ഓളം പേർ പങ്കെടുത്ത പിറന്നാൾ ആഘോഷത്തിലെ ചിത്രങ്ങളാണ് മറ്റുള്ളവരെ ഒഴിവാക്കി പ്രചരിപ്പിച്ചതെന്ന് ശശി തരൂർ പറഞ്ഞു. തരംതാണ രാഷ്ട്രീയമാണ് ഇതിനു പിന്നിലെന്നും അദ്ദേഹം വിമർശിച്ചു.
ലോക്സഭാ തിരഞ്ഞെടുപ്പ് നടക്കാനിരിക്കെ മനുഷ്യരെ താഴ്ത്തിക്കെട്ടാൻ എന്തുവേണമെങ്കിലും ശ്രമിക്കും. താനിതിനെ ഗൗരവമായി എടുത്തിട്ടില്ല, എടുക്കാൻ പോകുന്നുമില്ല. തന്നേക്കാൾ 10-20 വയസ്സ് താഴെയുള്ള എം.പിയാണ് മഹുവ മൊയ്ത്ര. തനിക്ക് അവർ കുട്ടിയാണ്. പിറന്നാളിന്റെ ആവേശത്തിൽ ആളുകൾ കുറച്ചൊക്കെ റിലാക്സ് ചെയ്ത സമയത്തെ ചിത്രങ്ങളാണ്. ചിത്രം പുറത്തുവിട്ടത് അവരുടെ സ്വകാര്യ ബന്ധത്തിലെ പ്രശ്നത്തിന്റെ ഭാഗമായാണെന്നും അതിൽ എനിക്ക് ഇടപെടേണ്ട ആവശ്യമില്ലെന്നും അദ്ദേഹം കൂട്ടിച്ചേർത്തു.
ശശി തരൂരും മഹുവയും അത്താഴവിരുന്നിൽ ഒരുമിച്ചുള്ള ചിത്രങ്ങളാണ് സാമൂഹിക മാധ്യമങ്ങളിൽ വ്യാപകമായി പ്രചരിപ്പിക്കപ്പെട്ടത്. ചിത്രത്തിലുള്ള മറ്റുള്ളവരെ നീക്കംചെയ്താണ് പ്രചരിപ്പിച്ചത്. ചിത്രം പ്രചരിച്ചതിന് പിന്നാലെ മഹുവ രംഗത്തെത്തിയിരുന്നു. ചിത്രത്തിലുള്ള മറ്റുള്ളവരെക്കൂടെ കാണിക്കാനായിരുന്നു മഹുവ ചിത്രം പ്രചരിപ്പിച്ചവരോട് ആവശ്യപ്പെട്ടത്.