ചെന്നൈ: കേരളത്തിലേക്ക് വീണ്ടും വന്ദേഭാരത് ട്രെയിൻ. ദീപാവലിയോടനുബന്ധിച്ചാണ് കേരളത്തിലേക്ക് വന്ദേഭാരത് സർവ്വീസ് അനുവദിച്ചത്. കർണാടക, തമിഴ്നാട്, കേരളം എന്നീ സംസ്ഥാനങ്ങളെ ബന്ധിപ്പിച്ചുകൊണ്ടായിരിക്കും പുതിയ വന്ദേഭാരത് സർവീസ് നടത്തുക. ദീപാവലി സ്പെഷ്യൽ സർവീസ് ആയിട്ടായിരിക്കും ഇത് ആരംഭിക്കുകയെങ്കിലും യാത്രക്കാരിൽ നിന്ന് മികച്ച പ്രതികരണം ലഭിക്കുകയാണെങ്കിൽ സർവീസ് സ്ഥിരമാക്കുമെന്ന റിപ്പോർട്ടുകളും പുറത്തു വരുന്നുണ്ട്.
ചെന്നൈയിൽ നിന്ന് ബെംഗളൂരുവിലേക്കും ബംഗളൂരുവിൽ നിന്ന് എറണാകുളത്തേക്കുമായുള്ള വന്ദേഭാരത് സർവീസ് ശൃംഖലയാണ് ഉണ്ടാവുകയെന്നാണ് വിവരം. ദക്ഷിണ റെയിൽവേ ലക്ഷ്യമിടുന്നത് മൂന്ന് സംസ്ഥാനങ്ങളെ ബന്ധിപ്പിച്ചുകൊണ്ട് എട്ട് സർവീസുകൾ നടത്താനാണ്. ചെന്നൈ-ബെംഗളൂരു, ബെംഗളൂരു-എറണാകുളം സൗത്ത് എന്നിങ്ങനെ ആകെ എട്ട് സർവീസുകൾ നടത്താനാണ് തീരുമാനിച്ചിരിക്കുന്നത്.
ചെന്നൈ സെന്ററിൽ നിന്ന് പുറപ്പെട്ട് രാവിലെ നാലു മണിയോടെ ബെംഗളൂരുവിലെത്തും. തുടർന്ന് നാലരയ്ക്ക് അവിടുന്ന് പുറപ്പെട്ട് എറണാകുളത്ത് ഉച്ചയ്ക്ക് ഒന്നരയോടെ എത്തും. തിരിച്ചും ഈ വിധത്തിൽ സർവീസ് നടത്താനാണ് പദ്ധതി.
പുതിയ സർവീസുകൾ ആരംഭിച്ചിട്ടുള്ളത് വാരാന്ത്യങ്ങളിലെ തിരക്ക് ഒഴിവാക്കുന്നതിന് ലക്ഷ്യംവെച്ചാണ്.