കോഴിക്കോട്: കരുവന്നൂർ ബാങ്ക് തട്ടിപ്പുമായി ബന്ധപ്പെട്ട് താൻ ഉന്നയിച്ച ആരോപണങ്ങൾക്കെതിരേ സിപിഎം സംസ്ഥാന സെക്രട്ടറിയേറ്റ് അംഗം പി കെ ബിജു നടത്തിയ പ്രസ്താവന കല്ലുവെച്ച നുണയാണെന്ന് കോൺഗ്രസ് നേതാവ് അനിൽ അക്കര. ഫേസ്ബുക്കിലൂടെയായിരുന്നു അദ്ദേഹത്തിന്റെ പ്രതികരണം.
കരുവന്നൂർ ബാങ്ക് തട്ടിപ്പ് സംബന്ധിച്ച് അന്വേഷണം നടത്താൻ പാർട്ടി അന്വേഷണ കമ്മീഷനെ നിയോഗിച്ചിട്ടില്ലെന്ന ബിജുവിന്റെ പ്രസ്താവനയ്ക്കെതിരേ അദ്ദേഹം രേഖകൾ പുറത്തുവിടുകയും ചെയ്തു. സിപിഎം ജില്ലാ കമ്മിറ്റിയുടെ തീരുമാനങ്ങൾ അടങ്ങുന്ന രേഖയാണ് അനിൽ അക്കര പങ്കുവെച്ചിരിക്കുന്നത്.
കല്ലുവെച്ച നുണ പറയുന്നതാരാണെന്ന് അനിൽ അക്കര ചോദിക്കുന്നു. കരുവന്നൂർ ബാങ്കിലെ സിപിഎം കമ്മീഷൻ അംഗമായ പി കെ ബിജു പറയുന്നു അങ്ങനെ ഒരു കമ്മീഷൻ ഇല്ലെന്ന്. പാർട്ടിയാപ്പീസിൽ ഇരിക്കുന്ന അന്വേഷണ റിപ്പോർട്ട് ഇന്ന് അരിയങ്ങാടിയിൽപ്പോലും കിട്ടും. കാലം മാറി ഇരുമ്പ് മറയ്ക്ക് തുരുമ്പായി ഓട്ടവീണു?? താനാരാണെന്ന് തനിക്കറിയില്ലെങ്കിൽ താൻ ചോദിക്ക് താനാരാണെന്ന് അതാണ് ഇപ്പോൾ ഓർമ്മവരുന്നതെന്നും അദ്ദേഹം പരിസഹിച്ചു. കരുവന്നൂർ ബാങ്കിന്റെ പ്രവർത്തനം സംബന്ധിച്ച് അന്വേഷിക്കാൻ പി കെ ബിജുവിനെ ചുമതലപ്പെടുത്തി ജില്ലാ കമ്മിറ്റി തീരുമാനമെടുത്തതായി രേഖയിലുണ്ട്.