തന്റെ പ്രിയപ്പെട്ട വളർത്തുനായ തിയോയുടെ വിയോഗത്തിൽ ഹൃദയംതൊടുന്ന കുറിപ്പുമായി നടി കല്യാണി പ്രിയദർശൻ. തിയോയുടെ മരണം തന്നെ തകർത്തുവെന്ന് കല്യാണി പറഞ്ഞു. തിയോ അപ്രതീക്ഷിതമായി വിടപറഞ്ഞു. സത്യം പറഞ്ഞാൽ, അന്നു മുതൽ താൻ ആകെ തകർന്നിരിക്കുകയാണ്. അവൻ ഏറ്റവും നല്ല ഹൃദയത്തിന് ഉടമയായിരുന്നു. ചെറിയ ശരീരത്തിൽ പ്രായമായ ഒരാളുടെ ഊർജമായിരുന്നു. തങ്ങൾ അവനെ വീട്ടുടമ എന്നാണ് വിളിച്ചിരുന്നത്. കാരണം ഇത് അവന്റെ വീടായിരുന്നു. തങ്ങൾ അവിടത്തെ താമസക്കാർ മാത്രമായിരുന്നുവെന്ന് കല്യാണി പറയുന്നു.
സ്റ്റുഡിയോയ്ക്കു വെളിയിൽ കാവൽ നായയായി ഇരിക്കാൻ അവൻ ഏറെ ഇഷ്ടപ്പെട്ടു. എന്നാൽ അവനെ പുന്നാരിക്കുന്നവരെയെല്ലാം അകത്തേക്ക് കയറ്റിവിട്ടു. എല്ലാ വേനൽക്കാലത്തും അവന് ഏറ്റവും മോശം ഹെയർക്കട്ട് ലഭിക്കുമായിരുന്നു. കാരണം അവനെവെച്ച് എന്തു ചെയ്യണമെന്ന് ഗ്രൂമേഴ്സിന് അറിയില്ലായിരുന്നു. അവനെ എടുത്ത് ഉമ്മവെച്ച സമയത്ത് ഇത് അവസാനത്തേതാണ് എന്ന് അറിഞ്ഞിരുന്നെങ്കിൽ താൻ കൂടുതൽ ചുംബിക്കുകയും കുറച്ചുനേരംകൂടി കയ്യിലെടുക്കുകയും ചെയ്യുമായിരുന്നു. പക്ഷേ ജീവിതം നമുക്ക് അങ്ങനെയൊരു മുന്നറിയിപ്പ് തരില്ലല്ലോ. അവനോട് സ്നേഹം കാണിച്ചവരോടെല്ലാം തന്റെ ഹൃദയത്തിൽ നിന്ന് നന്ദി പറയുന്നു. കഴിഞ്ഞ കുറച്ചു ദിവസങ്ങളിൽ തന്നെക്കുറിച്ച് അന്വേഷിക്കുകയും തന്റെ വേദനയിൽ പങ്കുചേരുകയും ചെയ്തവരോട് നന്ദി. നിങ്ങൾക്ക് അറിയില്ല അത് എനിക്കെത്രത്തോളം ആശ്വാസമായിരുന്നെന്നെന്നും കല്യാണി വ്യക്തമാക്കി.
തിയോ, ഞാൻ നിന്നോട് ക്ഷമചോദിക്കുന്നു. കഴിഞ്ഞ കുറച്ചു വർഷങ്ങളായി നീയുമായി അധിക സമയം ചെലവഴിക്കാൻ എനിക്കായില്ല. പക്ഷേ നീ ഏറ്റവും മികച്ചതായിരുന്നെന്ന് നീ അറിയണം. ഞാൻ നിന്നെ ഏറെ സ്നേഹിക്കുന്നുണ്ട്. നിന്റെ അവസാന ദിനങ്ങൾ സമാധാനത്തോടെയാകാൻ ഞാൻ പ്രാർത്ഥിച്ചു. ഒരു നല്ല മനുഷ്യൻ എന്നോട് പറഞ്ഞത് നമ്മുടെ വളർത്തുമൃഗങ്ങൾ നമ്മുടെ കഥകളിലൂടെ എല്ലാക്കാലവും ജീവിക്കുമെന്നാണ്. അങ്ങനെയെങ്കിൽ, നീ എല്ലാക്കാലവും ജീവിക്കുമെന്ന് ഞാൻ ഉറപ്പുതരുന്നു. ഐ ലവ് യൂ തിയോ. നീ എവിടെ വിശ്രമിക്കുകയാണെങ്കിലും സമാധാനത്തിലാണെന്ന് ഞാൻ കരുതുന്നുവെന്ന് കല്യാണി കൂട്ടിച്ചേർത്തു. തിയോയ്ക്ക് ഒപ്പമുള്ള ചിത്രങ്ങളും താരം പങ്കുവെച്ചു.