റിയാസ് മൗലവി വധക്കേസ് വിധി പറഞ്ഞ ജഡ്ജിയുടെ സ്ഥലംമാറ്റം; ചെയ്തത് സത്യമെങ്കിൽ ആരെ ഭയപ്പെടാനാണെന്ന് കെ ടി ജലീൽ

On: April 11, 2024

മലപ്പുറം: റിയാസ് മൗലവി വധക്കേസിലെ വിധി പറഞ്ഞ ജഡ്ജിയുടെ സ്ഥലം മാറ്റത്തിൽ പ്രതികരണവുമായി മുൻ മന്ത്രി കെ ടി ജലീൽ എംഎൽഎ. ഭീരുക്കളാണ് ഒളിച്ചോടുക. ചെയ്തത് സത്യമെങ്കിൽ ആരെ ഭയപ്പെടാനെന്ന് അദ്ദേഹം പറഞ്ഞു. ഫേസ്ബുക്കിൽ പങ്കുവെച്ച കുറിപ്പിലൂടെയായിരുന്നു അദ്ദേഹത്തിന്റെ പ്രതികരണം.

മനസ്സാക്ഷിക്കുത്ത് തോന്നിത്തുടങ്ങിയാൽ പിന്നെ നിൽക്കപ്പൊറുതിയുണ്ടാവില്ല. അത് കൊച്ചിയിലായാലും കൊയിലാണ്ടിയിലായാലുമെന്നും അദ്ദേഹം ഫേസ്ബുക്കിൽ കുറിച്ചു. അഭിഭാഷകനും നടനുമായ ഷുക്കൂർ വക്കീലിന്റെ പോസ്റ്റിൻറെ സ്‌ക്രീൻ ഷോട്ട് പങ്കുവെച്ചാണ് ജലീലിന്റെ പ്രതികരണം.

മെയ് മാസം, സമ്മർ വെക്കേഷനു ശേഷമാണ് സാധാരണ കോടതികളിൽ ജുഡീഷ്യൽ ഓഫീസർമാർക്ക് ട്രാൻസ്ഫർ ഉണ്ടാവുക. റിയാസ് മൗലവി കേസിൽ മൂന്നു പ്രതികളെയും കുറ്റ വിമുക്തരാക്കിയ കാസർഗോഡ് പ്രിൻസിപ്പൽ സെഷൻസ് ജഡ്ജിനു പതിവിനു വിപരീതമായി, അദ്ദേഹത്തിന്റെ ആവശ്യപ്രകാരം ഹൈക്കോടതി ആലപ്പുഴ ജില്ലാ ജഡ്ജായി ട്രാൻസ്ഫർ നൽകിയിട്ടുണ്ട് എന്നാണ് ഷുക്കൂർ വക്കീലിന്റെ ഫേസ്ബുക്ക് പോസ്റ്റിൽ പറയുന്നത്.

ആലപ്പുഴ ജില്ലാ പ്രിൻസിപ്പൽ സെഷൻസ് ജഡ്ജിയായാണ് കാസർകോട് ജില്ലാ പ്രിൻസിപ്പൽ സെഷൻസ് ജഡ്ജി കെ കെ ബാലകൃഷ്ണനെ സ്ഥലം മാറ്റിയത്. സ്ഥലം മാറ്റത്തിന് വിധിയുമായി ബന്ധമില്ലെന്നാണ് റിപ്പോർട്ട്.

Previous Post: പ്രധാനമന്ത്രി ദേശാടനപ്പക്ഷിയേപ്പോലെ; രൂക്ഷ വിമർശനവുമായി തമിഴ്നാട്

Next Post: താൻ എല്ലാവരേക്കാളും മുകളിൽ; ഇളയരാജ ഹൈക്കോടതിയിൽ

തീർത്ഥാടക സംഘം സഞ്ചരിച്ചിരുന്ന ബസിന് തീപിടിച്ചു; എട്ട് പേർ വെന്തുമരിച്ചു

ചണ്ഡീഗഡ്: ബസിന് തീപിടിച്ച് എട്ട് പേർ വെന്തുമരിച്ചു. ഹരിയാനയിലാണ് സംഭവം. തീർത്ഥാടക സംഘം സഞ്ചരിച്ചിരുന്ന ബസിനാണ് തീപിടിച്ചത്. ഹരിയാനയിലെ കുണ്ഡലി-മനേസർ-പൽവാൽ എക്സ്പ്രസ് വേയിൽ ശനിയാഴ്ച പുലർച്ചെ 1.30ഓടെയാണ് അപകടം ഉണ്ടായത്. അപകടത്തിൽ നിരവധി പേർക്ക് പരിക്കേറ്റു. ഉത്തർപ്രദേശിലെ മഥുരയിലും മറ്റ് തീർഥാടന കേന്ദ്രങ്ങളിലും സന്ദർശനം നടത്തി മടങ്ങിയവരാണ് ബസിലുണ്ടായിരുന്നത്. പഞ്ചാബ് സ്വദേശികളായ സ്ത്രീകളും കുട്ടികളും ഉൾപ്പെടെ 60 ഓളം പേരാണ് ബസിലുണ്ടായിരുന്നു. ബസിന്റെ പിൻഭാഗത്ത് നിന്നും തീ പടർന്നാണ് അപകടം സംഭവിച്ചത്. ബസിന്റെ പിൻഭാഗത്ത് പുകയും തീയും ശ്രദ്ധയിൽപ്പെട്ട ഒരു ബൈക്ക് യാത്രികനാണ് വിവരം ബസിലുള്ളവരെ അറിയിച്ചത്. ബസ് നിർത്തി ആളുകളെ ഇറക്കുമ്പോഴേക്കും തീ പടർന്ന് പിടിക്കുകയായിരുന്നു. 10 ദിവസത്തെ തീർഥാടന യാത്രയുടെ അവസാന ദിവസമാണ് അപകടം ഉണ്ടായത്. തങ്ങൾ വാടകയ്ക്ക് എടുത്ത ബസാണ് അപകത്തിൽപ്പെട്ടതെന്നും യുപിയിലെ തീർഥാടന കേന്ദ്രങ്ങളിലെ സന്ദർശനം കഴിഞ്ഞ് വെള്ളിയാഴ്ച രാത്രിയോടെയാണ് ഉത്തർപ്രദേശിൽ നിന്നും നാട്ടിലേക്ക് യാത്ര തിരിച്ചതെന്നും അപകടത്തിൽ നിന്നും രക്ഷപ്പെട്ടവർ വ്യക്തമാക്കുന്നു.
റെക്കോർഡ് കുതിപ്പ്; സംസ്ഥാനത്ത് സ്വർണ്ണ വില വീണ്ടും വർദ്ധിച്ചു

തിരുവനന്തപുരം: സംസ്ഥാനത്ത് സ്വർണ്ണ വില വീണ്ടും വർദ്ധിച്ചു. ഗ്രാമിന് 80 രൂപയുടെ വർദ്ധനവാണ് ഇപ്പോൾ ഉണ്ടായിരിക്കുന്നത്. 6,840 രൂപയാണ് ഇന്ന് ഒരു ഗ്രാം സ്വർണ്ണത്തിന്റെ വില. പവന് 640 രൂപയാണ് വർദ്ധിച്ചത്. 54,720 രൂപയാണ് ഒരു പവൻ സ്വർണ്ണത്തിന്റെ വില. ഏപ്രിൽ 19 ന് രേഖപ്പെടുത്തിയ 54,520 രൂപയായിരുന്നു ഇതിന് മുൻപുള്ള റെക്കോർഡ് വില. രാജ്യാന്തര വിപണിയിലെ വിലവർധനവാണ് കേരളത്തിലും വില കൂടാൻ കാരണം. പലിശ നിരക്കിൽ മാറ്റമില്ലാതെ തൽസ്ഥിതി തുടരുമെന്ന യുഎസ് ഫെഡറൽ റിസർവിന്റെ പണനയ പ്രഖ്യാപനമാണ് ഇപ്പോഴത്തെ സ്വർണ്ണവില വർദ്ധനവിന് കാരണം. നിക്ഷേപകർ വലിയതോതിൽ സ്വർണ്ണത്തിൽ താൽപ്പര്യം കാട്ടുന്നതും വിലവർദ്ധനയ്ക്ക് കാരണമായിട്ടുണ്ട്. രാജ്യാന്തര സ്വർണവില ഔൺസിന് 2414 ഡോളർ നിരക്കിലാണ് വ്യാപാരം തുടരുന്നത്. ഒരു ഗ്രാം 18 കാരറ്റ് സ്വർണ്ണത്തിന് ഇന്ന് 65 രൂപയാണ് ഉയർന്നത്. 5,596 രൂപയാണ് ഇന്ന് ഒരു ഗ്രാം 18 കാരറ്റ് സ്വർണ്ണത്തിന്റെ വില. ഒരു പവൻ 18 കാരറ്റ് സ്വർണ്ണത്തിന്റെ വില 44,248 രൂപയാണ്.
വി എസ് അച്യുതാനന്ദന്റെ പിടിവാശിയ്ക്ക് വഴങ്ങിയാണ് എൽഡിഎഫ് സോളാർ സമരം പ്രഖ്യാപിച്ചത്; ചെറിയാൻ ഫിലിപ്പ്

തിരുവനന്തപുരം: സോളാർ കേസുമായി ബന്ധപ്പെട്ട് സിപിഎം നടത്തിയ സെക്രട്ടേറിയറ്റ് വളയൽ സമരം ഒത്തുതീർപ്പാക്കാൻ ജോൺ ബ്രിട്ടാസ് ഇടപെട്ടുവെന്ന മുതിർന്ന മാധ്യമപ്രവർത്തകനായ ജോൺ മുണ്ടക്കയത്തിന്റെ വെളിപ്പെടുത്തലിൽ പ്രതികരണവുമായി ചെറിയാൻ ഫിലിപ്പ്. വി എസ് അച്യുതാനന്ദന്റെ പിടിവാശിയ്ക്ക് വഴങ്ങിയാണ് എൽഡിഎഫ് സോളാർ സമരം പ്രഖ്യാപിച്ചത്. ഒത്തുതീർപ്പ് സാധ്യത ആരാഞ്ഞ് തിരുവഞ്ചൂരാണ് തന്നെ വിളിച്ചതെന്നും അദ്ദേഹം അറിയിച്ചു. തിരുവഞ്ചൂർ രാധാകൃഷ്ണനുമായി ആത്മബന്ധമുള്ളതിനാൽ അദ്ദേഹം ആഭ്യന്തരമന്ത്രിയായിരുന്നപ്പോൾ അദ്ദേഹത്തിന്റെ ഔദ്യോഗിക വസതിയിൽ പോകുകയും ഭക്ഷണം കഴിക്കുകയും ചെയ്യുമായിരുന്നു. ആ ദിവസങ്ങളിൽ അവിചാരിതമായാണ് അദ്ദേഹത്തിന്റെ ക്ഷണപ്രകാരം താൻ അവിടെ പോകുന്നത്. സോളാർ സമരത്തിന്റെ രണ്ട് ദിവസം മുമ്പ് താൻ വീട്ടിൽ ചെന്നപ്പോളാണ് അദ്ദേഹം സോളാറുമായി ബന്ധപ്പെട്ട വിഷയം സംസാരിക്കുന്നത്. അതെല്ലാം ശ്രദ്ധാപൂർവം കേട്ടു. ആഭ്യന്തരമന്ത്രിക്ക് മുഖ്യമന്ത്രിയെ രക്ഷിക്കണമെന്ന് സ്വാഭാവികമായും ആഗ്രഹമുണ്ടായാൽ കുറ്റപ്പെടുത്താനാകില്ല. മുഖ്യമന്ത്രിയെ ന്യായീകരിച്ചുകൊണ്ടാണ് അദ്ദേഹം സംസാരിച്ചത്. സമരം പ്രായോഗികമല്ലെന്ന ആശങ്ക സി.പി.എം നേതാക്കൾക്കുമുണ്ടായിരുന്നു. വി.എസ്. അച്യുതാനന്ദന്റെ പിടിവാശിയ്ക്ക് വഴങ്ങിയാണ് എൽ.ഡി.എഫ് അങ്ങിനെയൊരു അപ്രായോഗിക സമരം പ്രഖ്യാപിച്ചത്. രണ്ട് മുന്നണികളും ഒരു പ്രതിസന്ധി നേരിടുകയായിരുന്നു. ആ സമരം നടന്നാൽ വലിയ പ്രശ്‌നങ്ങളുണ്ടായി തലസ്ഥാന നഗരി ഒരു കുരുതിക്കളമായിത്തീരുമോ എന്ന ആശങ്കയാണ് തിരുവഞ്ചൂർ പ്രകടപ്പിച്ചത്. എന്നാൽ, സമരത്തിനായി വരുന്ന ആളുകൾ എവിടെ താമസിക്കും ഇവരുടെ പ്രാഥമിക സൗകര്യങ്ങൾക്ക് എന്തുചെയ്യും എന്നിങ്ങനെയായിരുന്നു ചർച്ച. ഈ സമയത്താണ് അവിചാരിതമായി തിരുവഞ്ചൂരുമായി ചർച്ച നടത്തുന്നതെന്ന് അദ്ദേഹം ചൂണ്ടിക്കാട്ടി. തിരുവനന്തപുരത്ത് വാർത്താ സമ്മേളനത്തിൽ സംസാരിക്കുകയായിരുന്നു അദ്ദേഹം. തിരുവഞ്ചൂരിന്റെ വീട്ടിൽ നിന്നും നേരെ കൈരളിയിലേക്കാണ് ഞാൻ പോയത്. കുറേ നേരം കഴിഞ്ഞപ്പോൾ തിരുവഞ്ചൂർ എന്നെ ഫോണിലേക്ക് വിളിച്ചു ഒത്തുതീർപ്പിന് എന്താണ് മാർഗമെന്ന് ആരാഞ്ഞു. മറുവശത്തും ഇതേ ആഗ്രഹമുള്ളതായി അദ്ദേഹത്തോടും പറഞ്ഞു. ഈ സമയത്ത് ജോൺ ബ്രിട്ടാസിന്റെ മുറിയിലായിരുന്നു താൻ. തിരുവഞ്ചൂരും ബ്രിട്ടാസും തമ്മിലുള്ള ഫോൺ വിളിക്ക് താനാണ് സന്ദർഭം ഒരുക്കിയത്. ഒടുവിൽ, തങ്ങൾ നടത്തിയ ആലോചനയ്ക്ക് ശേഷം വൈകീട്ട് താനും ബ്രിട്ടാസും ഒരുമിച്ചാണ് തിരുവഞ്ചൂരിന്റെ വീട്ടിലേക്ക് പോയത്. അന്ന് തങ്ങളെ അലട്ടിയ പ്രശ്‌നം സമരം മുന്നോട്ട് പോയാൽ ആര് രക്ഷപ്പെടും ആര് ശിക്ഷിക്കപ്പെടും എന്നതല്ല. ഇത്രയും ആളുകൾ കൂട്ടത്തോടെ വന്നാൽ പാർട്ടി പ്രവർത്തകരെ നിയന്ത്രിക്കാൻ നേതാക്കൾക്കും കഴിയില്ല. പോലീസിനേയും നിയന്ത്രിക്കാനാവില്ല. കലാപകലുഷിതമായ അന്തരീക്ഷത്തിൽ തിരുവനന്തപുരത്ത് ഉണ്ടാകാൻ സാധ്യതയുള്ള ദുരന്തത്തെക്കുറിച്ചുള്ള ആശങ്കയാണ് തങ്ങൾ പങ്കുവച്ചതെന്നും ചെറിയാൻ ഫിലിപ്പ് പറഞ്ഞു. ഈ വിഷയം സ്വാഭാവികമായും തിരുവഞ്ചൂർ ഉമ്മൻ ചാണ്ടിയോട് സംസാരിച്ചിട്ടുണ്ടാകും. പിണറായിയോടും കോടിയേരിയോടും ജോൺ ബ്രിട്ടാസും കാര്യങ്ങൾ വ്യക്തമാക്കിയിരുന്നു. അന്ന് സമരം ഒത്തുതീർപ്പാക്കേണ്ടത് കേരളത്തിന്റെ ആവശ്യമായിരുന്നു. സമരം ഉപേക്ഷിച്ചതിൽ ഏറ്റവും സന്തുഷ്ടരായത് സിപിഎം അണികളായിരുന്നു. വലിയ ദുരന്തം ഒഴിവായ സന്തോഷമായിരുന്നു അവർക്ക്. കേരള ജനതയെ സംബന്ധിച്ചും ഇത് ആശ്വാസകരമായിരുന്നു. എന്നാൽ, ഇക്കാര്യം കേസുമായി ബന്ധപ്പെട്ട അന്വേഷണത്തെ ഒന്നും ബാധിച്ചില്ലെന്നും അദ്ദേഹം അറിയിച്ചു.
റെക്കോർഡ് വേഗത്തിൽ ബിരുദഫലം പ്രസിദ്ധീകരിച്ച് കാലിക്കറ്റ് സർവകലാശാല; ചരിത്രനേട്ടമെന്ന് മന്ത്രി

തിരുവനന്തപുരം: റെക്കോർഡ് വേഗത്തിൽ ബിരുദഫലം പ്രസിദ്ധീകരിച്ച കാലിക്കറ്റ് സർവ്വകലാശാലയുടേത് ചരിത്രനേട്ടമെന്ന് ഉന്നതവിദ്യാഭ്യാസ-സാമൂഹ്യനീതി മന്ത്രി ഡോ. ആർ. ബിന്ദു. 23 പ്രവൃത്തിദിവസം കൊണ്ടാണ് ആറാം സെമസ്റ്റർ ബിരുദപരീക്ഷാഫലം സർവ്വകലാശാല പ്രഖ്യാപിച്ച് ചരിത്രം കുറിച്ചത്. ഏറ്റവും കൂടുതൽ വിദ്യാർത്ഥികളെ പരീക്ഷയ്ക്കിരുത്തുന്ന കാലിക്കറ്റ് സർവ്വകലാശാല പരീക്ഷാനടപടിക്രമങ്ങൾ ആധുനികവത്കരിച്ചാണ് ഈ കുതിപ്പ് നടത്തിയിരിക്കുന്നത്. ഫാൾസ് നമ്പറിങ് ഒഴിവാക്കാൻ ഉത്തരക്കടലാസിലെ ബാർകോഡിങ്, ക്യാമ്പുകളിലേക്ക് ഉത്തരക്കടലാസെത്തിക്കാൻ തപാൽവകുപ്പുമായി സഹകരണം, മാർക്ക് രേഖപ്പെടുത്താൻ ആപ്പ്, ഉത്തരക്കടലാസുകൾ സുരക്ഷിതമായി സൂക്ഷിക്കാനും പുനർമൂല്യനിർണയത്തിനായി എളുപ്പത്തിൽ തിരിച്ചെടുക്കാനും ഡിജിറ്റൽ സ്റ്റോറേജ്, സെന്റർ ഫോർ എക്‌സാം ഓട്ടോമേഷൻ ആന്റ് മാനേജ്‌മെന്റ് സംവിധാനം എന്നിവയിലൂടെയാണ് സർവ്വകലാശാല ഈ മികവ് കൈവരിച്ചിരിക്കുന്നത്. സാങ്കേതികവിദ്യയ്‌ക്കൊപ്പം അധ്യാപകരും ജീവനക്കാരും അവരുടെ ജോലികൾ യഥാസമയം ചെയ്തതും അതിവേഗ ഫലപ്രഖ്യാപനത്തിന് സഹായകമായി. അധ്യാപകരേയും ജീവനക്കാരെയും മന്ത്രി അഭിനന്ദിച്ചു. ഫലം സർവകലാശാലാ വെബ്‌സൈറ്റിൽ ലഭ്യമാണ്. ജൂൺ ആദ്യവാരത്തോടെ ഗ്രേഡ് കാർഡ് വിതരണം തുടങ്ങുമെന്നും മന്ത്രി കൂട്ടിച്ചേർത്തു.
എല്ലാ സ്‌കൂളുകളിലും ഇന്റേണൽ കമ്മറ്റി രൂപീകരിക്കണം; വിദ്യാഭ്യാസ വകുപ്പിന് വനിതാ കമ്മിഷന്റെ ശുപാർശ

തിരുവനന്തപുരം: പുതിയ അധ്യയന വർഷത്തിന്റെ തുടക്കത്തിൽ തന്നെ എല്ലാ സ്‌കൂളുകളിലും സ്ത്രീകൾക്കെതിരായ ലൈംഗിക അതിക്രമം തടയുന്നതിനുള്ള പരാതി പരിഹാര സംവിധാനമായ ഇന്റേണൽ കമ്മറ്റി രൂപീകരിച്ചിട്ടുണ്ടെന്ന് ഉറപ്പുവരുത്തണമെന്ന് വിദ്യാഭ്യാസ വകുപ്പിന് കേരള വനിതാ കമ്മിഷൻ ശുപാർശ നൽകി. അധ്യാപക രക്ഷകർത്തൃ സംഘടന (പിടിഎ) രൂപീകരണവും പിടിഎ എക്‌സിക്യുട്ടീവ് കമ്മറ്റിയുടെ പ്രവർത്തനവും സർക്കാർ മാർഗനിർദേശം പാലിച്ച് ആയിരിക്കണമെന്ന നിർദേശം എല്ലാ സ്‌കൂളുകൾക്കും നൽകണമെന്നും ശുപാർശ ചെയ്തു. വിദ്യാഭ്യാസ മന്ത്രി വി. ശിവൻകുട്ടിയെ ഓഫീസിൽ എത്തി സന്ദർശിച്ച കേരള വനിതാ കമ്മിഷൻ അധ്യക്ഷ അഡ്വ. പി. സതീദേവിയും വനിതാ കമ്മിഷൻ അംഗം അഡ്വ. ഇന്ദിരാ രവീന്ദ്രനും ശുപാർശ കൈമാറി. ഇന്റേണൽ കമ്മറ്റി കൃത്യമായി യോഗം ചേരുന്നുണ്ടെന്ന് നിരീക്ഷിക്കുന്നതിന് ജില്ലാതലത്തിൽ വിദ്യാഭ്യാസ വകുപ്പിന്റെ ഒരു ഉദ്യോഗസ്ഥയെ ചുമതലപ്പെടുത്തണമെന്ന് ശുപാർശ ചെയ്തു. പല വിദ്യാലയങ്ങളിലും പോഷ് ആക്ട് അനുശാസിക്കുന്ന പരാതിപരിഹാര സംവിധാനം രൂപീകരിച്ചിട്ടില്ല എന്നാണ് സംസ്ഥാനത്തിന്റെ വിവിധ ഭാഗങ്ങളിൽ നിന്ന് അധ്യാപികമാർ വനിതാ കമ്മിഷനു നൽകുന്ന പരാതികളിലൂടെ വ്യക്തമായിട്ടുള്ളത്. രൂപീകരിച്ചിട്ടുള്ളിടത്തു തന്നെ ഇന്റേണൽ കമ്മറ്റി കൃത്യമായി യോഗം ചേരുകയോ, പരാതി വന്നു കഴിഞ്ഞാൽ അതുപരിഹരിക്കാനുള്ള സംവിധാനം ഏർപ്പെടുത്തുകയോ ചെയ്തിട്ടില്ല. അതിനാൽ ഇന്റേണൽ കമ്മറ്റി രൂപീകരിക്കാത്ത എല്ലാ സ്‌കൂളുകൾക്കെതിരേയും ആവശ്യമായ നടപടി സ്വീകരിക്കണമെന്നും ശുപാർശ ചെയ്തു. സംസ്ഥാനത്തിന്റെ വിവിധ ഭാഗങ്ങളിൽ നിന്നും അധ്യാപികമാരുടെ പരാതികൾ കമ്മിഷനു മുൻപാകെ വന്നിട്ടുള്ള പശ്ചാത്തലത്തിലാണ് പല സ്‌കൂളുകളിലും പോഷ് ആക്ട് അനുശാസിക്കുന്ന പരാതി പരിഹാര സംവിധാനമായ ഇന്റേണൽ കമ്മറ്റി നിയമപ്രകാരം രൂപീകരിച്ചിട്ടില്ല എന്ന കാര്യം വനിതാ കമ്മിഷന്റെ ശ്രദ്ധയിൽപ്പെട്ടത്. സ്‌കൂൾ പിടിഎ എക്‌സിക്യുട്ടീവ് കമ്മറ്റിയുടെ രൂപീകരണം സംബന്ധിച്ച് സംസ്ഥാന സർക്കാർ സർക്കുലർ പുറപ്പെടുവിച്ചിട്ടുണ്ട്. എന്നാൽ, ഈ സർക്കുലറിലെ മാനദണ്ഡങ്ങൾക്ക് വിധേയമായല്ല പല സ്‌കൂളുകളിലും പിടിഎ കമ്മറ്റികളുടെ രൂപീകരണവും പ്രവർത്തനവും നടക്കുന്നതെന്നും വനിതാ കമ്മിഷനു മനസിലാക്കാൻ കഴിഞ്ഞിട്ടുണ്ട്. ഇതിന്റെ അടിസ്ഥാനത്തിലാണ് ശുപാർശ സമർപ്പിച്ചിട്ടുള്ളത്.