കണ്ണൂർ: ഇത്തവണ ലോക്സഭാ തെരഞ്ഞെടുപ്പിൽ കെപിസിസി അധ്യക്ഷൻ കെ സുധാകരൻ കണ്ണൂരിൽ വീണ്ടും മത്സരിച്ചേക്കും. ലോക്സഭാ തിരഞ്ഞെടുപ്പിൽ സുധാകരന് മത്സരിക്കുന്നതിന് കോൺഗ്രസ് ദേശീയ നേതൃത്വം അനുമതി നൽകിയെന്നാണ് പുറത്തു വരുന്ന വിവരം. സംസ്ഥാനത്ത് കോൺഗ്രസിന്റെ എല്ലാ സിറ്റിങ് എംപിമാരും സ്ഥാനാർഥികളാകുമെന്ന സൂചനയാണ് പുറത്തു വരുന്നത്.
ചില ആരോഗ്യപ്രശ്നങ്ങൾ ചൂണ്ടിക്കാട്ടിയായിരുന്നു ഇത്തവണ മത്സരരംഗത്തേക്കില്ലെന്ന് കെ സുധാകരൻ അറിയിച്ചിരുന്നത്. പാർട്ടിയിൽ വിവിധ കോണുകളിൽ നിന്നുള്ള സമ്മർദ്ദത്തിന് വഴങ്ങിയാണ് സുധാകരൻ മത്സരിക്കാൻ തീരുമാനിച്ചതെന്നാണ് സൂചന. കണ്ണൂരിൽ സിപിഎം പാർട്ടി ജില്ലാ സെക്രട്ടറി എം വി ജയരാജനെ മത്സരത്തിനിറക്കുന്ന സാഹചര്യത്തിൽ കരുത്തനായ സ്ഥാനാർഥിതന്നെ മണ്ഡലത്തിൽ വേണമെന്ന നിലപാടിലാണ് കോൺഗ്രസ്.
മൂന്ന് തവണ കണ്ണൂർ ലോക്സഭാ മണ്ഡലത്തിൽ കെ സുധാകരൻ മത്സരിച്ചിട്ടുണ്ട്. 2009-ലും 2019-ലും അദ്ദേഹം വിജയിച്ചു. 2014-ലെ തെരഞ്ഞെടുപ്പിൽ പി കെ ശ്രീമതിയോട് മത്സരിച്ച് പരാജയപ്പെടുകയും ചെയ്തിരുന്നു.