ന്യൂഡൽഹി: തമിഴ്നാട്ടിൽ എ.ഐ.എ.ഡി.എം.കെയുടെ നിരവധി നേതാക്കൾ ബിജെപി അംഗത്വം സ്വീകരിച്ചു. 15 മുൻ എംഎൽഎമാരും ഒരു മുൻ എംപിയുമടക്കം നിരവധി നേതാക്കളാണ് ബി.ജെ.പിയിൽ ചേർന്നത്. പാർട്ടി സംസ്ഥാന അധ്യക്ഷൻ കെ അണ്ണാമലൈ, കേന്ദ്ര മന്ത്രിമാരായ രാജീവ് ചന്ദ്രശേഖർ, എൽ മുരുഗൻ തുടങ്ങിയവർ ചേർന്നാണ് ഡൽഹിയിലെ ബിജെപി ആസ്ഥാനത്ത് നേതാക്കൾക്ക് പാർട്ടി അംഗത്വം നൽകിയത്.
തമിഴ്നാട് ബി.ജെ.പിയുടെ വഴിക്കാണ് നീങ്ങുന്നതെന്നും ഇത്രയും നേതാക്കൾ കൂട്ടത്തോടെ ബി.ജെ.പിയിൽ ചേർന്നത് തമിഴ്നാട്ടിൽ പ്രധാനമന്ത്രിയുടെ ജനകീയതയ്ക്ക് തെളിവാണെന്നും തമിഴ്നാട് ബി.ജെ.പി. അധ്യക്ഷൻ അണ്ണാമലൈ വ്യക്തമാക്കി. തുടർച്ചയായി മൂന്നാം തവണയും അധികാരത്തിൽ വരാൻപോകുന്ന പ്രധാനമന്ത്രി നരേന്ദ്ര മോദിയുടെ കരങ്ങൾ ശക്തിപ്പെടുത്താനാണ് ഇവർ പാർട്ടിയിലേക്ക് കടന്നുവന്നിരിക്കുന്നത്. അനുഭവ സമ്പത്തുള്ളവരാണ് ഇവരെന്നും അദ്ദേഹം അഭിപ്രായപ്പെട്ടു.