സര് സിപിയെപ്പോലും ലജ്ജിപ്പിക്കുന്ന കിരാത നടപടിയാണ് യൂത്ത് കോണ്ഗ്രസ് സംസ്ഥാന അധ്യക്ഷന് രാഹുല് മാങ്കൂട്ടത്തിന്റെ നാടകീയമായ അറസ്റ്റെന്ന് കെപിസിസി പ്രസിഡന്റ് കെ സുധാകരന് എംപി. സമനില തെറ്റിയതുപോലെയാണ് സ്തുതിപാടകരാല് ചുറ്റപ്പെട്ട മുഖ്യമന്ത്രി പ്രവര്ത്തിക്കുന്നത്. പിണറായി വിജയന് രാഹുലിനെ കരിച്ചു കളയാമെന്ന് കരുതുന്നുണ്ടെങ്കില് ആ പരിപ്പ് ഇവിടെ വേകില്ല. ഇതിന് കനത്ത തിരിച്ചടി ഉണ്ടാകുമെന്നു സുധാകരന് മുന്നറിയിപ്പ് നൽകി.
അപ്രതീക്ഷിതമായി, പൊലീസ് മര്ദനമേറ്റ രാഹുലിനെ ആശുപത്രിയില് നിന്നു ചികിത്സ കഴിഞ്ഞ വന്നയുടനേയാണ് അറസ്റ്റ് ചെയ്തത്. ഇങ്ങനെ ഭീകരരോടുപോലും ചെയ്യില്ല. ക്രിമിനല് കേസിലെ പ്രതികളെ പിടികൂടുന്നതുപോലെ വീടുകയറി വളഞ്ഞിട്ട് പിടികൂടേണ്ട ഒരു സാഹചര്യവുമില്ല. ജനങ്ങളുടെ ഇടയില് ജീവിക്കുന്ന പൊതുപ്രവര്ത്തകനാണ് സംസ്ഥാനത്തെ ഏറ്റവും വലിയ യുവജനപ്രസ്ഥാനമായ യൂത്ത് കോണ്ഗ്രസിന്റെ സംസ്ഥാന അധ്യക്ഷനായ രാഹുല്. പോലീസ് സ്റ്റേഷനില് നേരിട്ട് നോട്ടീസ് അയച്ചുവിളിച്ചാല് ഹാജരാകുന്നയാളാണ് അദ്ദേഹം.
രാഹുലിനെ അറസ്റ്റ് ചെയ്തത് സിപിഎമ്മും പൊലീസും ചേര്ന്നുള്ള വ്യക്തമായ ഗൂഢാലോചനയുടെ അടിസ്ഥാനത്തിലാണ്. നവകേരള സദസിനെതിരെ പ്രതിഷേധിച്ച യൂത്ത് കോണ്ഗ്രസ് പ്രവര്ത്തകരെ ചെടിച്ചട്ടിയും ഇരുമ്പുവടിയും കൊണ്ട് അക്രമിച്ച ഡിവൈഎഫ്ഐ -സിപിഎം ക്രിമിനലുകളും കുറുവടി ഉപയോഗിച്ച് പ്രവര്ത്തകരെ മര്ദ്ദിച്ച മുഖ്യമന്ത്രിയുടെ സുരക്ഷാ ഉദ്യോഗസ്ഥരും കെപിസിസി ഭാരവാഹിയുടെ വീടാക്രമിച്ച ക്രിമിനലുകളും സൈ്വര്യവിഹാരം നടത്തുമ്പോഴാണ് രാഹുല് മാങ്കൂട്ടത്തെ അറസ്റ്റ് ചെയ്തത്. വിമര്ശിക്കുന്നവരെ നിശബ്ദമാക്കാമെന്നാണ് ഈ ഫാസിസ്റ്റ് ഭരണാധികാരി കരുതുന്നതെന്നും സുധാകരന് ചൂണ്ടിക്കാട്ടി.