തിരുവനന്തപുരം: ചലച്ചിത്ര സംവിധായകനും നടനുമായ മേജർ രവിയും കണ്ണൂരിലെ പ്രമുഖ കോൺഗ്രസ് നേതാവായിരുന്ന സി രഘുനാഥും ബിജെപി അംഗത്വം സ്വീകരിച്ചു. ഡൽഹിയിൽ പാർട്ടി അദ്ധ്യക്ഷൻ ജെ പി നദ്ദയുമായി ഇരുവരും കൂടിക്കാഴ്ച്ച നടത്തി. ഇരുവർക്കും ജെ പി നദ്ദ ആശംസകൾ നേർന്നു. കൂടിക്കാഴ്ച്ചയുടെ ചിത്രങ്ങൾ ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ ഫേസ്ബുക്കിലൂടെ പങ്കുവെച്ചിട്ടുണ്ട്.
വരും ദിവസങ്ങളിൽ കൂടുതൽ പ്രമുഖ വ്യക്തിത്വങ്ങൾ പാർട്ടിയിൽ ചേരാൻ സന്നദ്ധരാവുമെന്ന് കെ സുരേന്ദ്രൻ പറഞ്ഞു. സി രഘുനാഥ് കോൺഗ്രസ്സിന്റെ ഉന്നതനേതാക്കളിലൊരാളാണ്. കഴിഞ്ഞ തെരഞ്ഞെടുപ്പിൽ ധർമ്മടത്ത് പിണറായി വിജയനെതിരെ യുഡിഎഫ് സ്ഥാനാർത്ഥിയായി അദ്ദേഹം മത്സരിക്കുകയും ചെയ്തിരുന്നു.
ദേശീയതയോട് ചേർന്ന് പ്രവർത്തിക്കാനാണ് ആഗ്രഹമെന്ന് മേജർ രവി വ്യക്തമാക്കി. കമ്യൂണിസ്റ്റ് പാർട്ടിയും കോൺഗ്രസും ദേശീയതക്കെതിരെ പ്രവർത്തിക്കുന്നുവെന്ന് ബിജെപി അംഗത്വം സ്വീകരിച്ചതിന് പിന്നാലെ സി രഘുനാഥ് പ്രതികരിച്ചു.