രാജസ്ഥാനിലെ നാളത്തെ വോട്ടെടുപ്പിനായി ജനങ്ങൾ തയ്യാർ. ഇന്ന് നിശബ്ദ പ്രചാരണ ദിവസമാണ് അതിനാൽ ഫോണിൽ വിളിച്ചും വോട്ടർ മാരെ നേരിൽ കണ്ടും വോട്ടു ഉറപ്പിക്കുന്ന തിരക്കിലാണ് സ്ഥാനാർഥികൾ. രാവിലെ ഏഴു മുതൽ വൈകീട്ട് 6 വരെയാണ് പോളിംഗ്. 200 സീറ്റുകളാണ് രാജസ്ഥാൻ നിയമ സഭയിലുള്ളത്. അഞ്ചു കോടി 25 ലക്ഷത്തിലേറെ വോട്ടർമാരാണ് സംസ്ഥാനത്ത് ഉള്ളത്.
സംസ്ഥാനത്ത് 51756 പോളിംഗ് ബൂത്തുക്കളാണ് ക്രമീകരിച്ചിരിക്കുന്നത്. ഒരു മണ്ഡലത്തിലെ വോട്ടെടുപ്പ് കോണ്ഗ്രസ് സ്ഥാനാർഥി ഗുർ മിത് സിങ് കോനൂർ മരിച്ചതിനെ തുടർന്ന് മാറ്റി വച്ചിട്ടുണ്ട്. ആദ്യഘട്ട അഭിപ്രായ സർവേ ഫലങ്ങളിൽ ബിജെപിക്ക് അനുകൂലമായ തരംഗം പ്രവചിച്ചിരുന്നു. എങ്കിലും, അവസാന ഘട്ടത്തിലേക്ക് എത്തുമ്പോൾ ഇരു പാർട്ടികളും ബലാബല മത്സരം തുടരുകയാണ്.