കൊൽക്കത്ത: പാർട്ടിക്കുവേണ്ടി പ്രതിഫലേച്ഛയില്ലാതെ വിവിധ മേഖലകളിൽ പ്രവർത്തിക്കാൻ സന്നദ്ധരായവരിൽ നിന്ന് അപേക്ഷ ക്ഷണിച്ച് പരസ്യം നൽകി സിപിഎം. സിപിഎമ്മിന്റെ പശ്ചിമബംഗാൾ ഘടകമാണ് അപേക്ഷ ക്ഷണിച്ചിട്ടുള്ളത്. ലിങ്ക്ഡ് ഇൻ ആപ്പിലാണ് കോർപ്പറേറ്റ് ശൈലിയിൽ പരസ്യം നൽകിയിരിക്കുന്നത്. കമ്പനികൾ ഉദ്യോഗാർഥികളെ തേടുന്ന ആപ്ലിക്കേഷനാണ് ലിങ്ക്ഡ് ഇൻ.
ഡിജിറ്റൽ പ്രചാരവേല, സാമ്പത്തിക മേൽനോട്ടം, ഓഫീസ് നടത്തിപ്പ്, നാട്ടിലിറങ്ങിയുള്ള വിവരശേഖരണം തുടങ്ങിയ മേഖലകളിൽ വൈദഗ്ധ്യം ഉള്ളവരെയാണ് പാർട്ടി അന്വേിക്കുന്നുണ്ട്. ഗ്രാഫിക് ഡിസൈനർമാർക്കായും അപേക്ഷ ക്ഷണിച്ചു.
ഇടതുപക്ഷ രാഷ്ട്രീയത്തോട് താത്പര്യവും സമർപ്പിത സേവനത്തിനുള്ള മനഃസ്ഥിതിയും ഉള്ളവരായിരിക്കണം അപേക്ഷകരെന്നാണ് നിബന്ധന. ഇത് ഒരു ജോലിയായി കണക്കാക്കരുതെന്ന നിബന്ധനയുമുണ്ട്. ഈയിടെ നടന്ന പാർട്ടിയുടെ സംസ്ഥാന ‘മിനി പ്ലീനത്തിൽ ഡിജിറ്റൽ പ്രചാരണം ശക്തമാക്കുന്നതിനെപ്പറ്റി കൂടിയാലോചനകൾ നടന്നിരുന്നു. പാർട്ടി ഓഫീസുകളിൽ ഇതിന്റെ ചുമതലയുള്ളവരുടെ പ്രവർത്തനം മികച്ചതാണെന്നായിരുന്നു ഈ യോഗത്തിലെ വിലയിരുത്തൽ.