തിരുവനന്തപുരം: കോൺഗ്രസ് ലോക്സഭ തിരഞ്ഞെടുപ്പിന് സജ്ജമായിട്ടില്ലെന്ന് കെ പി സി സി അധ്യക്ഷൻ കെ സുധാകരൻ. പ്രാദേശിക പ്രശ്നങ്ങൾ പറഞ്ഞു തീർക്കണമെന്ന് അദ്ദേഹം ആവശ്യപ്പെട്ടു. ഗ്രൂപ്പ് കളിയും തമ്മിലടിയുമാണ് ഇപ്പോൾ നടക്കുന്നതെന്നും അദ്ദേഹം ചൂണ്ടിക്കാട്ടി.
തിരഞ്ഞെടുപ്പ് നടക്കാൻ മാസങ്ങളേയുള്ളൂ. എന്നാൽ, അതിനു വേണ്ട തയ്യാറെടുപ്പുകൾ എടുത്തോയെന്ന് അദ്ദേഹം ചോദിക്കുന്നു. ഒരുപാട് ഇടത്ത് നിഷ്ക്രിയമാണെന്നും സജീവമല്ലെന്നും അദ്ദേഹം അഭിപ്രായപ്പെട്ടു. ഒരു പ്രവർത്തനവും നടക്കാത്ത മണ്ഡലങ്ങളുണ്ട്. പരിശോധനയ്ക്ക് ശേഷം അത്തരം മണ്ഡലം കമ്മിറ്റികൾ പിരിച്ച് വിട്ട് പുതിയ മണ്ഡലം കമ്മിറ്റികൾ ഉണ്ടാക്കുമെന്ന് അദ്ദേഹം അറിയിച്ചു.
കെ സുധാകരൻ എന്ന നിലയ്ക്കല്ല, കെപിസിസി പ്രസിഡന്റെന്ന നിലയിൽ പറയുകയാണ്. മാറാൻ മനസ്സു കാണിക്കണം. തിരുത്താൻ മനസ്സു കാണിക്കണം. തിരുത്തി പാർട്ടിയെ ശക്തിപ്പെടുത്താനുള്ള പ്രവർത്തനത്തിലേക്ക് പോകണം. ഒരാഴ്ചയ്ക്കുള്ളിൽ അതിന്റെ ഫലവും ചലനങ്ങളും പരിശോധിക്കുമെന്നും അത് കാണണമെന്നും സുധാകരൻ കൂട്ടിച്ചേർത്തു.