തിരുവനന്തപുരം: പോരിനാണ് സർക്കാരിന് താൽപര്യമെങ്കിൽ സ്വാഗതം ചെയ്യുന്നുവെന്ന് ഗവർണർ ആരിഫ് മുഹമ്മദ് ഖാൻ. സർക്കാർ നൽകിയ ബില്ലുകളിൽ വ്യക്തത ആവശ്യപ്പെട്ടിട്ടുണ്ടെന്നും ഇത് ലഭിച്ചാൽ വേണ്ട നടപടികൾ സ്വീകരിക്കുമെന്നും അദ്ദേഹം അറിയിച്ചു.
സർക്കാരിന് ഏറ്റുമുട്ടൽ മനോഭാവമുള്ളതിനാലാണ് ഗവർണർ നിയമിച്ച വൈസ് ചാൻസലർക്ക് എതിരെ ഷോ കോസ് നോട്ടീസ് നൽകിയത്. കെടിയു മുൻ വിസി സിസാ തോമസിന് അനുകൂലമായ ഹൈക്കോടതി വിധിയെ സ്വാഗതം ചെയ്യുന്നുവെന്നും അദ്ദേഹം വ്യക്തമാക്കി.
രാജ് ഭവനിൽ ചെല്ലേണ്ടതില്ലയെന്ന മുഖ്യമന്ത്രിയുടെ നിലപാടിനോട് പ്രതികരിക്കുന്നില്ല. സർക്കാർ രാജ്ഭവനോട് വഴക്കിടാൻ ശ്രമിക്കുകയാണ്. ബില്ലിനെതിരെ പരാതി ലഭിച്ച സാഹചര്യത്തിലാണ് മന്ത്രിസഭ പാസാക്കിയ ഭൂനിയമ ഭേദഗതി ബില്ലിൽ സർക്കാരിനോട് വിശദീകരണം തേടിയത്. സർക്കാരിന്റെ മറുപടി ലഭിച്ച ശേഷം തുടർനടപടിയുണ്ടാകുമെന്നും ഗവർണർ കൂട്ടിച്ചേർത്തു.