77 – മത് സന്തോഷ് ട്രോഫി ഫുട്ബോൾ ടൂർണമെന്റിനുള്ള കേരള ടീമിനെ പ്രഖ്യാപിച്ചു. 22 അംഗ ടീമിനെ നിജോ ഗിൽബെർട്ട് നയിക്കും. ഗോവയിൽ വച്ചാണ് മത്സരം നടക്കുന്നത്. സതീവൻ ബാലനാണ് മുഖ്യ പരിശീലകൻ. ഗുജറാത്തുമായാണ് കേരളത്തിൻ്റെ ആദ്യമത്സരം. നിലവിൽ കാലിക്കറ്റ് സർവകലാശാല സ്റ്റേഡിയത്തിലാണ് ടീം പരിശീലനം നടത്തുന്നത്. 10 പുതുമുഖ താരങ്ങൾക്കൊപ്പം 12 പരിചയ സമ്പന്നരും ഉൾപ്പെടുന്നതാണ് ടീം. ഈ മാസം 8 ന് ടീം കോഴിക്കോട് നിന്ന് ഗോവയിലേക്ക് യാത്ര തിരിക്കും.
2018ൽ കേരളം ചാമ്പ്യൻമാരായപ്പോൾ സതീവൻ ബാലനായിരുന്നു പരിശീലകൻ. കേരള ടീം പരിശീലക സ്ഥാനത്തേക്ക് സതീവൻ ബാലൻ അടക്കം അഞ്ചുപേരെയാണ് കേരള ഫുട്ബോൾ അസോസിയേഷൻ പരിഗണിച്ചിരുന്നത്. സന്തോഷ് ട്രോഫിയിൽ ഗോവ, ഗുജറാത്ത്, ഛത്തീസ്ഗഢ്, ജമ്മു കശ്മീർ, അരുണാചൽപ്രദേശ് എന്നീ ടീമുകൾക്കൊപ്പമാണ് കേരളം പ്രാഥമിക റൗണ്ടിൽ കളിക്കുന്നത്.