ഹൈദരാബാദ്: കേന്ദ്ര സർക്കാരിനെതിരെ ആഞ്ഞടിച്ച് കോൺഗ്രസ് അധ്യക്ഷൻ മല്ലികാർജുൻ ഖാർഗെ. പണപ്പെരുപ്പവും തൊഴിലില്ലായ്മയും പോലുള്ള വിഷയങ്ങളിൽ സർക്കാരിനെ ചോദ്യം ചെയ്യുന്ന സാഹചര്യങ്ങളിലൊന്നും കേന്ദ്രം കൃത്യമായ മറുപടി നൽകാറില്ലെന്ന് ഖാർഗെ പറഞ്ഞു. ഹൈദരാബാദിൽ നടന്ന കോൺഗ്രസ് പ്രവർത്തക സമിതി യോഗത്തിൽ സംസാരിക്കവെയായിരുന്നു അദ്ദേഹത്തിന്റെ പരാമർശം.
അടിസ്ഥാന പ്രശ്നങ്ങൾ ഉന്നയിക്കുമ്പോൾ സർക്കാർ കൃത്യമായ മറുപടി നൽകാറില്ല. ഇത്തരം സാഹചര്യങ്ങളിൽ ‘5 ട്രില്യൺ സമ്പദ്വ്യവസ്ഥ’, ‘അമൃതകാൽ’ തുടങ്ങി പുതിയ മുദ്രാവാക്യങ്ങൾ ചൂണ്ടിക്കാട്ടി അവർ വിഷയം മാറ്റുന്ന തന്ത്രം സ്വീകരിക്കുന്നുവെന്ന് അദ്ദേഹം പരിഹസിച്ചു.
രാജ്യം മൂന്നാമത്തെ വലിയ സമ്പദ് വ്യവസ്ഥയാകുമെന്നത് നിലവിൽ കേന്ദ്രം മുന്നോട്ട് വയ്ക്കുന്ന ആശയമാണ്. എന്നാൽ, മുദ്രാവാക്യങ്ങളിലൂടെ രാജ്യം പുരോഗമിക്കില്ല. പരാജയങ്ങൾ മറച്ചുവെക്കാനുള്ള മുദ്രാവാക്യങ്ങളാണിവയെന്ന് പൊതുസമൂഹത്തോട് കോൺഗ്രസ് വിശദീകരിക്കുമെന്നും അദ്ദേഹം അറിയിച്ചു.